Shah thang petrol bomb sa uwei u dkhar ha Bishnupur

Shillong, 17 Naiwieng:
Ki runar ki bym tip satia, ki la rung kynsan hapoh kawei ka dukan sha ba la tip kyrteng kum ka Babua Tea Stall kaba don ha ïew Bishnupur, Shillong, bad ki la thang ia u trai jong ka dukan hadien ba ki la dep ban kynshait da ka petrol.
Kane ka la jia ha ka por 11 baje mynstep ha kane ka sngi Saitjain mynsngi. U trai ka dukan uba la tip kyrteng kum u Bishashwar Das, 45 snem uba don hapoh katei ka dukan u la mynsaw jur. Kham mynshwa, uwei u dkhar u la khlad noh hadien ba la shah thang da ka petrol ha dukan ha Motphran.
Ki runar kiba la tap bha ia la ka dur khmat da ki jaiñ ki la leit rung kynsan bad wiang ding ia utei u trai dukan hadien ba ki la dep kynshait da ka petrol kaba u la rah ha u klong ba la thep hapoh ka pla plastik.
Ka khubor na ki pulit ka la iathuh ba kumba lai ngut ki runar, ha kaba uwei u la kynshait da ka petrol ia utei u Das katba uwei pat u la thang. Hadien kane ka jingjia, la pynkit noh mar mar ia utei u trai dukan sha ka jaka ai jingsumar ha Woodland, ha kaba la ong ba ka jinging jong utei u briew ka la long kumba sanphew na ka shispah.
Na ka liang ki pulit kiba her kyrkieh mar iaioh jingtip, ki la sdang ban pynlong ia ka jingtohkit halor kane ka jingjia, bad kyrmen ban thwet bad kem ia ki runar kiba donkti ha kane ka kam.
Ha kane ka jingjia uwei u rangbah briew ba la tip kyrteng kum u Mina Ram Joshi ( 70 snem) uba la pyrshang ban iarap ia u Das bad kawei ka thei samla kaba wan dih sha ha katei ka dukan ki la mynsaw malu mala.
Kane ka jingjia shah thang jong ki nongkhaïi bar jylla, kan dei ka sien kaba ar kaban jia hapoh ka nongbah Shillong, ha kaba ka jingjia kaba nyngkong ka la jia ha ka 9 tarik u Risaw, ha kaba uwei u Vikash Nandwal u la khlad noh namar ka jingjur jong ka jingmynsaw ha nongbah Delhi hapdeng ka jingshah sumar ha ka 26 tarik jong utei hi u bnai.
Ha ka jingjia ha Motphran, ki pulit ki la kem ruh ia ki ar ngut ki dkhot jong ka Khasi Students’ Union ( KSU) ba kynthup ia u Wankerlang Jyrwa bad u Badonkupar Nongbri halor ka jingkynnoh donkti ha katei ka kam.