Shah thang ki kali sorkar hapoh Dima Hasao

Shillong: Ki tyllong khubor ki ia thuh ba ka jing pakhang shnong ka ba tip kum ka ‘indefinite Dima Hasao bandh’ bala khot da ka Indigenous Students’ Forum (ISF) hapoh ka district Dima Hasao ka la poi ka jing julor jong bun tylli ki kali khamtam jong ki nongtrei sorkar.

Kumba shu pynkyn maw ia ka pakhang shnong hapoh ka district la khot da ka ISF naduh 5 baje mynstep jong ka 11 tarik 2020 na ka bynta ban dawa la ka jong ka district na ka bynta ki paidbah bynriew Dima Hasao.
Hadien ba sdang ka pakhang shnong ka la don ruh ka jing ia pyni bor hapdeng ki nong kyrshan ia ka pakhang shnong bad ki bor pulit.
Ha ka por 12 baje mynsngi ki nong kyrshan ia ka pakhang shnong ki la pynjulor ia ka kali jong u Panchali Shyam u ba dei ruh u ‘civil judge-cum-assistant sessions judge’ ha ka shnong Mahdeb Tilla ka ba hap hapoh Haflong. Ka la don ruh ka jing shah thang ia ka kali sorkar jong u ophisar ka tnat ‘forest’ u Ramen Das hajan ka Synod Rotary ha Haflong. Ki lad pathai khubor ki iathuh ba ar ngut ki nongtrei jong ka tnat Information & Public Relations ki la shah shoh ha ki ba kyrshan ia ka pakhang shnong.
Haba dei bad ka jing shah pynjulor ki kali sorkar bad ki pulit na ka liang ki bor pulit ki la kem noh ia u president ka North Cachar Hills Indigenous Students’ Forum (NCHISF) u David Keivom ban pynlong ia ka jing tohkit.