Shah thang ka ophis Veterinary ha Nongstoin Hapoh 48kynta, pyllait ia uba shah kem naba bamja:HNYF

Shillong, 2 Risaw:
Hynnin ka janmiet kumba ha ka por 11 baje duna ka ophis ka Veterinary Department ha Nongstoin (WKH) ka la shah thang ha ki runar bym tip satia. Ha kane ka jingjia, ka kompiwter bad ka printer jong kane ka ophis ka la ing.
Ki pulit ki la ong ba kiba leh ia kane dei ki runar ki suba ba dei ki dkhot jong ki sengbhalang kiba pynlong ia ka jingiakhih ia ka Inner Line Permit (ILP) ha kane ka jylla. Ki dang pynlong ia ka jingtohkit kaba bniah halor kane ka jingjia ban lap ia kiba donkti.
Ha kawei ka jingjia, hynnin ka sngi ha ka por 2 baje mynstep, ki runar ki la shoh la dat ia uwei u nongniah ka trok uba la tip kyrteng kum u Dilip Pawdel (25 snem) ha Wahkoh, Umkiang jong ka East Jaintia Hills.
Ha kawei pat ka khubor, na ka liang ka seng HNYF West Jaintia Zone (WJZ) ka la byrngem bad dawa na ka sorkar ba ka dei ban pyllait noh ia u dkhot jong ka u Bah E.Syngkon uba la shah kem ha ki pulit katba u dang bamja ha ing. Katei ka seng ka la dawa ba ki pulit ki dei ban pyllait noh ia utei u dkhot ka seng hapoh 48 kynta naduh ba mih ka khubor, lym kumta kin pynlong ia ka jngiakhih ba tyngeh ha Jaintia Hills.
Shuh shuh ka kyrwoh na ka HNYF ka la kynnoh ba ki pulit ki la shu pharep ia u dkhot ka seng ba u la pynthut ia ki pulit hynrei ka seng ka la kyntait war ia katei ka jingpharep ki pulit kiba la kem khlem daw ia u Bah Syngkon. Ka seng ka la ong ruh ba ki briew katei ka thain ki tip bha ia ka jinglong utei u dkhot ka seng namar u long u briew uba donburom bad u briew ba kum ma u um leh hi ruh kumba la kynnoh ki pulit , ka la ong ruh ba wat ki bahaing ha sem jogn u ki la iathuh ba la kem ia u khlem daw katba u dang bam ja ha ing.
“Ngi ai por 48kynta naduh ba mih kane ka khubor ia ka sorkar ba ka dei ban pyllait noh mardor ia u tei u rangbah nongialam jong ka seng khlem kano kano ka jingteh kyndon lym kumta ngin pyrkhat da kawei ka lynti”ong Pynbiang Rymbai VP HNYF ER ryngkat ka jingpynrem jur ia ki pulit kiba la kem ia u Bah Syngkon. Ka la kynnoh ruh ba kane ka jingkem kulmar ka sorkar ka pyndom pynban ia ka seng.