Shah thang ka ophis ka Sericulture ha Ri Bhoi

Nongpoh, 14 Jylliew:
Ym lah shuh ban batai kane ka jingiakhih ban pyrshah ia lynti Rel da ka KSU sha ka jylla shano kan ialam, ha kaba ka jingiathang ia ki ophis sorkar ka nangbteng katba nangmih ki sngi bad ia kane la sakhi ruh halor ka jingshah thang ka ophis jong ka Manager, jong ka tnat Sericulture, kaba la jia mynta ka sngi, dangstep phyrngap ha shnong Mawpdang, Ri Bhoi District.
Ha ka jingjurip da ki nongthohkhubor, la lap ba katei ka ophis, kaba la shah wiangding ka la julor bha, ha kaba la iohi ba la jan baroh ki bynta jong katei ka iing ki la ingkhong khait bad wanrah ruh ia ka jingjulor kaba jur.
Haba ioh ban iakren bad ka Kong R.B Lyngwa, kaba dei ka District Sericulture Officer, ka la iathuh ba kane ka jingjia ka la jia mynta ka sngi, ha ka por 2:10 baje mynstep, ha kaba kane ka Manager’s Office, ka dei ka iing kaba buh ia ki symbai khniang na ka bynta ban sam sha ki nongrep khniang.
Ka la iathuh ruh ba ha ka jingshah wiangding ia kane ka iing ka la don ka jingjulor kaba bun bha, ha kaba bun na ki tiar ba donkam kiba kynthup naduh ki file lem bad kiwei kiwei de ki tiar ba donkam kiba don ha katei ka iing ki la ingkhong bad julor lut. Lada khein kyllum lang baroh ia ka jinglut jingsep na kane ka jingshah thang dusmon ka la kot sha ka T. 32 Lak.
“Tang ia iohi ba kane ka ophis ka la shah thang, wut wut nga pyntip sha ka ADC ka Ri Bhoi ban phah ia ki kali pynlip ding bad da ka jingpoi kloi jong ki kali pynlip ding khyndiat la lah ban tem noh na ka jingjulor kiba khambun”, ong ka Kong R.B Lyngwa.
Halor jong kane ka jingshah thang dusmon ia katei ka Manager’s Office, na ka liang ki briew na ka tnat Sericulture ba kynthup ia u Director bad Joint Secretary ka tnat Sericulture & Weaving ka sorkar jylla, ki la wan ban jurip ia ka jingjulor na kane ka jingshah thang dusmon ha ki runar.
Namarkata, haba iadei bad kane na ka liang ka District Sericulture Officer, ka la ujor ruh pyrshah ia ki runar kiba la donkti ha katei ka jingthang dusmon bad ha kajuh ruh ka por kin iatreilang ha ka jingtohkit da u SP ka Ri Bhoi.