Shah thang ka kali U SDO PWD & kem ding ka kali u heh pulit

Shillong, 27 Nailur:
Mynta ka sngi, ki runar ki la kawang 2 tylli ki petrol bom ia ka iingsah jong u heh pulit Inspector General of Police (IGP), u BR Rana ha 4th furlong ha kaba uwei u la bthei bad uwei pat um shym la bthei.
Une u petrol bom uba la bthei u la leit dei ia ka kali scorpio jong une u heh pulit kaba don ia u number ML02 0437 ha kaba ki ar tylli ki shaka kiba don ha ka liang ka mon ki la kem ding bad ing. Katkum ka jingiathuh jong u Superintendent of Police (SP), jong ka East Khasi Hills District u bah Mariahom Kharkrang, u la iathuh ba mynta ka sngi ha ka por 12.30 baje shiteng sngi kumba 5, 6 ngut ki khynnah samla ki la leit rung j ubor ha iing jong jong utei u heh pulit BR Rana ha kaba ki la kawang ar tylli ki petrol bom.
U la iathuh ba napdeng kine ki ar tylli ki petrol bom ba la kawang da kine ki runar tang uwei uba la bthei ha kaba u la leit kem ding ia ki ar tylli ki shaka ba don sha ka mon jong kali scorpio bad ki la kem ding.
Ha kawei pat ka jingjia mynta ka sngi ha ka por 2.30 baje janmiet ki runar ki la leit ban kawang petrol bom ha ka karkhana ot dieng jong u Rajesh Gurung kaba don ha Lumshyiap, Nongmynsong.
Na ka liang jong u SP bah Kharkrang u la iathuh ba na ka daw ba ka jingiarap ban pynlip kham kloi ia ka ding da ki riew paidbah kam shym la don kano kano ka jingjulor.
Lah ban kdew ba kane ka dei ka sien ba nyngkong hapoh ka jingiakhih ILP ba ka kali u heh pulit kan shah thang. Kane ka jingjia ka la jia mynta ka sngi hapoh ki kynta pakhang ophis kaba khadduh ki sengbhalang kaba la kut noh mynta ka sngi.
Shuh shuh ha kawei pat ka jingjia mynta ka miet ha ka por 8 baje kawei ka kali sorkar kaba dei ba pyndonkam da u Bah Marcus Pohrmen U SDO Building ka PWD Nongstoin ka la shah thombor haka ki runar ha kaba katei ka kali Gypsy kaba don ia u nombar ML 01 4181 ka la julor. Ki pulit ki la iathuh ba ki seat, ki jingkhang bad ka rong ka kali ki la julor. Katei ka jingjia ka la jia ha Mawlai Umjaiur.
Lah ruh ban kdew ba haduh 55 tylli ki case la register hapoh ki jingjia iakhih ILP ha kaba la pynngat hapoh ka kyndon Meghalaya Maintenance of Public Order Act bad kumba 49 ngut ki la shah kem na ki jingjia bapher bapher ka iakhih ILP.