Shillong,12 Nailur:
Ka ophis jong ka Foreign Race Seeds Station, ka iing ri khniang jong ka tnad Sericulture ka sorkar kaba don ha Moodymmai ka la shah thang mynta ka sngi dangstep phyrngap. Katei ka ophis ka dei kaba don harud surok NH 44 hajan ka shnong Mookyndur West Jaintia Hills.
Katkum ka jingiathuh u bah B Mawthoh.Manager Foreign Race Seeds Station, Moodymmai u la ong ba ha ka por 5 baje mynstep, ki la kyndit ban iohi ba katei ka ing ri khniang ka la kem ding ha kaba marsien iohi ia kane ka jingjia ki ba sah marjan ki la pyrshang ban pynlip ia ka ding. U Bah Mawthoh u la ong ba hadien ba la lap ia katei ka jingja ki la pyntip noh sha ki pulit mar-mar. Ha katei ka jingkem ding katei ka ophis ka jingduh ka la kot sha ka T.7 lak tyngka eiei, ka ing ka la kot kumba T.5 lak bad ki jingdon jingem hangta hapoh ing ki la kot sha ka T.2 lak tyngka. U la iathuh ba baroh ki jingdon jingem ki la ing bad duh lut, ka dei ka jingjia kaba la jur bha, ong u Bah Mawthoh Manager ka FRSS.
Ha kawei pat ka jingjia ar ngut ki samla ki la shah kem ha Ri-Bhoi hynnin ka miet; kitei ki samla kiba la shah kem ki kynthup ia u Johnyfast Lyngdoh (22 snem) bad u Mebanshuwa Kharphuli (20 snem), kiba la shah kem najan Umsning. Ki pulit ki la kem ia kitei ki ar ngut kiba long ruh ki dkhot ki sengbhalang , la kem ia ki ha ka por 1 baje mynstep namar ka jingkynnoh ba ki kawang maw ha ki kynta pakhang surok miet.Ia kitei baroh 2 ngut la rah sha Nongpoh PS.
Sa ha kawei pat ka jingjia uwei u briew uba la tip kyrteng kum u Gotam Pradhan u la lait im haba ki runar ki la leit wiang ding ia ka iing jong u ha Saiden Umlaper kaba jngai kumba san kilometer na Nongpoh. Ki pulit ki la iathuh ba katei ka jingjia ka la jia ha ka por 2 baje mynstep jong ka sngi Palei ha kaba ki runar ki la wiang ding ia kane ka iing. U Pradhan uba dang ioh thiah u la kyndit thret bad iohi da ka ding bad u la khie ban pynlip ha kaba u la theh da ka um ban pynlip ia ka ding.
Ha kawei pat ka jingjia, mynta ka janmiet, kawei ka thuk thuk jong U Pradeep Limbu, ka la shah thang, ha ka jaka sah jongu, ha Law u Sib, ha kaba katei ka thuk thuk, ka la julor lut khoit.
Ki thymmei khubor ki la iathuh ba mynta ka step ha ka por kumba 2:30 baje eiei, ki runar ki la wiang ding ia ka Vacational Training Office jong ka Veterinary Department ha kyrdemkulai, Ri Bhoi. Halor kane ki pulit ki la kem ia u Rilang thongni bad u Michael Mynsong. Ka jingthwet ia kiwei pat ka dang iaid shakhmat. Ha kawei pat ka jingjia, ha ka 11 tarik por kumba 3 baje eiei mynstep, ki runar ki la pyrshang ban thang ia ka ophis jong u Range Officer, Soil Water Conservation Range ha Thadlaskein, West Jaintia, tangba kam pat shym la julor satia.
Ha kawei pat ka khubor, na ka liang jong ka KSU Nongthymmai Circle ka pynpaw ia ka ia ka jingsngew pyrshah jur halor ka jingleh dondor ka tnad pulit ha kaba ha ka miet jong ka shiphew tarik mynta u bnai ki la kem pathar ia ki samla khasi na lumpyngngad halor ka jingkynnoh ba ki donkti ha kaba thaw jingkulmar ha ka por jong ka pakhang surok miet. Ka seng ka pynpaw ba kine kim dei satia ki dkhot ka seng ruh hynrei ki long tang ki langknia ha ka kti ki bor ka ain. Ka seng ha kane ka khyllipmat ka kyntu ia ki samla ka bri u hynniewtrep ban ym tieng ne riej ia kine ki bor kohtympan hynrei ban ieng rangbah ban dawa ia ka hok na ka bynta ka lawei ka jaidbynriew.
Phi don ban ong eiei?