Shah thang ka Gypsy pulit, ha u paidbhur ha Mookhep

Shillong, 23 Nailur:
Kawei ka Gypsy pulit, ka shah thang ha ki paidbah mynta ka miet, ha ka shnong Mookhep, kaba don mar syndah bad ka shnong Bapung, ha East Jaintia Hills District.
La iathuh ba ka jingjia, ka sdang, ha ka por 8baje mynta ka miet, ha kaba ka la don ka jing khang kali, ha ki bynta jong katei ka thain bad halor katei ka jingjia, ki Magistrate lem bad ki pulit ki la leit ban pahara sha katei ka jaka bad ha katei ka por, ka la don ruh ka jing thang shaka kali ha surok bah. Ynda la wan ki pulit, u paidbhur, uba la ia lum lymbung, ula beh thong ia ki pulit bad ki la ioh ruh ban thang ia kawei ka kali pulit.
Haduh ba thoh ia kane ka khubor, ka la don ka jingriew suloi bad ym tip, la ka dei ka jingsiat kaba wan na ka liang jong ki pulit ne ki riew paidbah bad la ka dei ka jingsiat kaba sha suin ne kaba siat sha u paidbah, uba ia kulmar ha katei ka jaka.
La pyrshang ban iakren bad U SP katei ka District, tangba ym shym la ioh satia.