Shah tan sa ka kali kit nongpang jong ka HITO, ha ki pulit

Shillong:Ka kali kit nongpang jong ka seng Hynniewtrep Integrates Territorial Organization (HITO) ka la shah tan noh sha Sadar Police Station na parking lot kaba don pyrshah bad ka SBI Main Branch, hadien ba la jia ka jingiapyni bor hapdeng ki dkhot ka seng bad ki pulit ha khmat ka DC ophis Shillong.

Ka jingioh ban tan ki pulit ia katei ka kali kit nongpang jong ka seng HITO, ka dei ba ki dkhot ka seng ki la ia phet krad hynnin ka sngi, namar ka jingkthong ki pulit ban bom ban tied ia ki.
Kane ka jingjia huri hura ka dei kaba la jia hynnin ka sngi nyngkong ha kaba ka seng ha ka jingialam u bah Donbok Dkhar, kum u President ki la thmu ban tur beit mar mar sha Secretariat ban bret ia ki plakad ba ki rah, ba la thoh pynrem ruh ia ka sorkar MDA-2.

Ka jingthmu jong ka seng ban leit sha Secretariat, ka dei hadien ba ki la mih na sadar police station ba shah khot hajir halor ka jingshah kynnoh ba ki pynkhien iaka kyndon Section 171 CrPc.

Kumta ki pulit mynta ka sngi, ki la rah biang ia ki 9 ngut ki dkhot ka seng ba la shah kem sha Civil hospital shillong ban leh biang ia ka medical check up.

Hadien ba la dep ban leh ia ka Medical check up, ki pulit ki la rah noh sha ka iing kashari ban tian bishar ia ki.