Shah talasi kali ha nongbah

Shillong, 20 Risaw:
Shwa ba u president ka ri u Pranab Mukerjee un wan jngoh ia ka jylla, ki pulit ki la pynjur ia ka jingpahara bad talasi jur ia ki paidbah ki kali ba iaid ba ieng, namar ka jingkhot pakhang shnong ka seng lehnoh ka HNLC ba 36 kynta naduh 6 baje myn step ka 21 tarik haduh 6 baje janmiet ka 22 tarik.
Ki pulit ki la pynjur ia ka jingpahara, khamtam ha ki jaka ban iaid u President bad ki la talasi ruh ia ki paidbah khnang ban pynthikna ba kan ym don kano kano ka ban lah ban pynwit ia ka jingwan jong u President.
Ka HNLC ka la khot ia ka pakhang shnong ba 36 kynta ban pyrshah ia ka jingwan u president ka ri bad ka 21 tarik kan dei ruh ka sngi iap jong u Syiem Wickliffe Syiem.
U President un wan poi ha ka nongbah lashai ka sngi Nyngkong un leit ban iadon bynta ha kiba bun ki jingialang kynthup ba un kren ha iing dorbar, un pynkup burom ia ki samla pule ka NEHU bad un leit jngoh ia ka Don Bosco Centre ha Mawlai.
Kum ka dak ban ioh ia ka jingsngew jong ki paidbah halor kane pakhang shnong, ka Informed Conscious and Responsible Existence (ICARE), kan pynlong ia ka jingiatai lashai ka sngi ha Khyndai Lad bad hadien kan don ka jingiatem iarwai naduh ka por 12 baje janmiet ban pyrshah ia ka pakhang shnong ka HNLC.