Shah sospon 2 ki pulit ba jrong kti kynthei bad shoh briew

Shillong, 3 Iaiong:
Ar ngut ki heh pulit ka jylla ki la shah sospon uwei u la shah sospon namar ka jingjrong kti bad leh kynshleiñ ia ka khynnah kynthei bad uwei pat namar ba u shoh briew. Kitei ki pulit ki dei kiba la tip kyrteng kum u Davis Marak utei u dei uba jrongkti bad leh kynshlein ia kawei ka khynnah kynthei kaba dang rit ka rta ha Jengjal Outpost bad uwei pat u dei u OC ka Rongramu bah A.Bamon, utei u la shah sospon namar ba shoh ia u nong niah kali ka Meghalaya transport corperation (MTC) ha Goeragre.
U David u la shah sospon hadien ba kiba haing katei ka khynnah ki la ujor ha Tura PS mynhynin ka miet,ha ka FIR la ujor ba ha ka 4 tarik u bnai ba la dep ha ka por 7:30 baje mynmiet ki pulit ki la bat ia ka thuk thuk ha ka shnong Waribokgre, ha kaba ia katei ka thuk thuk la niah da uwei rangbah uba dei u nongniah kali bad katei ka khynnah rit bad la leit rah sha Jengjal Out Post da kaba kynnoh ba u nongniah u dei u dkhot ka GNLA.
“Ki la shoh ia nga bad ki la kren bein ruh lai phew jait,ki labom na kjat na kti jong nga, ngam ju lapha ka jingim jong nga kum katei ka jingshah shoh,nga la tieng bha hynrei nga la ioh ban phet krad na katei ka jaka, nga dei na ka iing kaba duk bad nga tieng bha ngam tip shuh shano ngan leit pyntip ia katei ka jingjia” ong utei u nongniah thuk thuk.
Hynrei katei ka jingjia ka la paw pyrthei hadien ba ki ba ha iing ki la leit wad jingiarap na ki sengbhalang katkum katei ka FIR la ong ba u David u la buh ia katei ka khynnah kynthei (kaba shong lang ha ka thuk thuk) ha Jengjal Outpost haduh ka por mynmiet bad hangtei ki la leh kynshlein ia ka, “La rah ia nga sha Outpost ki la buh ia nga hangtei haduh ba la miet bha, ka la don ka jinglip ding ha katei ka Outpost ha katei ka miet,utei u ophisar uba la bu-aid ula wan ban leh kynshleiñ ia nga, hadien ki leit buh ia nga sha iing” ong katei ka khynnah.
U SP ka West Garo Hills u Mukesh Singh mynta ka sngi u la pynthikna sha ki lad khubor ba ia ki ar ngut ki pulit la sospon bad ka jingtohkit ka dang iaid shakhmat, u la ong ba ia u bah A.Bamon ruh la sospon namar ba u shoh ia u nongniah kali jong ka MTC.