Shah siat u rangbah ha Madan Umwang

Nongpoh, 05 Nailar:
Uwei u riew Rang-bah ia ka la tip kyrteng kum u Bah Smer Kurbah na ka Shnong Madan Umwang, Ri Bhoi District, u la mynsaw jur, hadien ba mynta ka sngi ha ka por 5 baje janmiet u la shah siat ha ki ar ngut ki briew da ka Suloi Tynsah.
Kitei ki briew kiba la donkti ban siat pynmynsaw ia utei u riew rangbah, la tip kyrteng kum u kum u Bhuta Warmalai bad u Elleven Warmalai.
Haba iadei bad kane, na ka liang u Bah G.D Kharwanlang SP ka Ri Bhoi, u la iathuh ba kitei ki arngut ki la siat da katei ka suloi pyrshah ia u Bah Smer Kurbah na ki bynta ka kpoh bad na ki bynta jong ka kti.
U la ong ruh, tang mar ia tip halor jong katei ka jingjia, na ka liang ki Pulit ka Mawlasnai Police Outpost ki la hiar mar mar sha katei ka jaka, na ka bynta ban ai jingiarap ia utei u Rangbah ba la shah siat bad ki pulit ki pynkit noh ia utei u rangbah sha Mawlasnai PHC, na ka bynta ban ioh jingsumar, hynrei khnang ban ioh ia ka jingsumar ba paka la rah noh ia u sha CHC Bhoirymbong.
Ia ka daw kaba thikna halor jong katei ka jingshah siat ia utei u rangbah ym pat lah ban tip, hynrei ki pulit ki la suba ba ka lah ban dei na ka jingiapher jingmut bad ka jingiashun, kaba pynlong ia utei u rangbah ba un shah siat da katei ka suloi haduh ba un da mynsaw jur.
Kumta halor jong kane ka jingjia, na ka liang ki Pulit ka Mawlasnai Police Outpost, ym tang ba ki la iarap ia utei u rangbah ba la shah siat, hynrei ki la shim khia ruh ban kem ioh ban kem ia kitei ki ar ngut ki rangbah ba don kti ha kane ka kam runar bad ka jingtohkit halor kane ka jingjia kan dang iaid shakhmat, pynkut u Bah G.D Kharwanlang.