Shah shoh u samla ha ban da iap

Shillong, 24 Lber:
Uwei u samla uba la tip kyrteng kum u Sainborlang Passah khun jong u bah Thomad Reenborn na ka shnong Umkor, Pynursla u la iap hadien ba u la shah shoh ha ki hynniew ngut kiwei pat ki samla kiba dei hi na ka shnong Umkor. Katei ka jingjia ka la jia ha ka 22 tarik mynta u bnai. Utei u samla u la shah shoh ha ka por ba u dang wan phai na ka jaka ba pynlong Mela na madan ialehkai Urksew, hynrei haba u la poi hajan ka ophis ka tnad Custom, kitei ki hynniew ngut kiba la wan da ka Sumo ki la hiar bad ki la bom la tied ia u, ha ban da jem jai, bad u la khlad noh haba la poi hapho Hospital.
Ki hynniew ngut kiba la tip kyrteng kum u Bestarwell Khongsni, u Poiboklang Khongtani, u Kenny Khongtani, u Iarborlang Khongtani, u shemphang Khontani , u Damanbha Ryngksai, u Shembhalang Riahtam, kiba la donkti ban shoh ia utei u ha ban da iap ki la shah kem ha ki pulit ka Pynursla PS, bad la phah ia ki sha kashari ban pan bor ba kin don hapoh ka jingtohkit ki pulit. Kitei baroh 7 ngut ki dei na kajuh ka shnong bad uba shah pyniap na Umkor, Pynursla. Na ki 7 ngut saw ngut na ki ki dei kiba dang don hapoh ka 18 snem karta (Juvinille) katba lai-ngut pat ki dei kiba la palat ia ka 18 snem karta.
Katkum ki tyllong khubor ba la ioh lum, la iathuh ba haduh mynta ym pat tip ia ka daw tynrai ba kitei ki 7 ngut ki la pyngiap ia utei u samla hynrei la ong ba ka la don teng ka jingiadondaw kaba rim, kaba ki la ia buh shun sah, la antad ba ka daw ka dei hi ka jingiawit hapoh ka jaka pynlong Mela.