Shillong: Ka kong Sweety Kharsati, kaba na Nongthymmai, Nongshiliang, Block 4, ka la ujor sha ki pulit jong ka Bengaluru, Karnataka, ha kaba ka la iathuh ba u khun jongka, U Amon D Kharsati (24), ula leit trei ha ka call centre ha Punjab, lyngba ka kam, kaba la pynioh da u paralok jongu, U Jason Marbaniang, ha kaba u iathuh ba katei ka dei ka kam ha ka kompeni Amazon.
Hadien ba ula trei ar taiew ha katei ka kompeni, la don kiwei pat ki paralok jongu, kiba tyrwa ba un trei ha kawei pat ka kompeni, da kaba ki tyrwa ia ka jingsiew kaba kham heh bad katei ka dei ha Coimbatore.
Hadien, ba ula trei kumba katto katne sngi ha katei ka jaka, u sngewthuh ba ka dei ka kompeni kaba thok bad ba u kwah ban mih noh na katei ka jaka; hynrei kitei ki briew kiba don ha katei ka jaka, ki la kynnoh, ba ula tuh ia ki tiar na katei ka jaka bad ki la shoh ruh ia u bad ki dawa ruh ba un siew pisa T.20,000, ha kaba ki phah ban thep ia ka pisa ha ka account jong u paralok jongu, U bah Jason Marbaniang.
Kitei ki da mynjur, ba ynda ula siew ia katei ka pisa, kin sa pyllait noh da kaba suk, ba un mih na katei ka jaka, hynrei hadien kata, ki knieh noh ia ka mobile phone, ka id card bad kiwei ruh bad ha ka por 3baje mynstep jong ka 9tarik Naiwieng 2019, la iathuh ba utei U Bah
Amon, ula lait phet na katei ka jaka, hynrei shaei ba u don pat, ym shym la tip satia haduh mynta, ong ka ejahar na ka kmie jongu.
Phi don ban ong eiei?