Shah shoh pynmynsaw uwei u samla ha ki briew ba kam ba ki dei ki KSU

Shillong:Ka Seng HYC Photjaud Rangthong unit ka pynrem jur ia ki briew kiba la kam ialade ba ki dei ki dkhot jong ka seng Khasi Students Union, kiba la leit ban rah jubor bad shoh pynmynsaw ia u Samla Pynshngainlang Wanniang u ba dei u dkhot jong kane ka Seng HYC.

Katkum ka kyrwoh jong u Bah Pyn hunlang Lyngdoh, President ka HYC Photjaud Rangthong, u la iathuh ba ha ka step jong ka 10tarik Nailar, ha ka por 9.00 baje mynstep, katba u samla Pynshngainlang u dang thiah ha ing, ki la wan ki briew kiba don kumba 20 ngut tam eiei da ka kali truck pickup bad ki la kam ba ki dei ki dkhot jong ka KSU bad ki la sei jubor ia une u samla na jingthiah, ki la rahbor sha Mawkyrwat sha ophis ka KSU bad ki la shoh la bom haduh da u mynsaw.“Ngi dawa na ka bor jong ka ain ban pynshitom ia kine ki briew kat kum ka Ain,” ong u bah Pynhunlang.