Shah shoh ki nongbylla Khasi ha u bar Jylla ha Law Jyllieh

Nongstoiñ, 19 Jylliew:
Ki katto katne ngut ki nongtrei bylla kiba dei ki Khasi kiba bylla ruh ha kawei ka kompani kaba la tip ruh kum ka ‘TANTIA’ kaba dei ka kompeni kaba pyntrei ia ka Nongstoin Greater Water Supply Scheme (NGWSS) kaba don ha Law Jyllieh, ki la kynnoh ba ki la shah ktah kti ha u wei u bar Jylla u ba dei ruh artad u Manager jong katei ka kompeni.
Katkum ka kyrwoh na u samla Mawkordor Syiemlieh President ka WYF, u la ong ba ha kaba iadei bad katei ka jingjia na ka liang jong ki lai tylli ki seng bhalang jong ka thain Nongstoiñ, kiba kynthup ia ka W.Y.F, W.K.S.U Central Body bad ka H.Y.C Nongstoiñ Circle, hadien ba ki la ioh ia ka jingujor da ka jingthoh na kitei ki nongbylla, ha katei ka company ki la pynpaw ia ka jingbitar halor ka jingleh dusmon bad leh meng jong u tei u bar Jylla u ba pyniaid ia katei ka Company TANTIA.
Shuh shuh kitei ki lai tylli ki seng bhalang, ki la dawa ia ki heh nong pyniaid jong katei ka Kompeni ba ki dei ban weng noh ia u Manager ba dei peit ia ka jingtrei ha Nongstoiñ, bad na ka liang jong kitei ki lai seng, ki la ai por ruh tang shitaiew ia katei ka Kompani ba ka dei ban weng noh ia u tei u Manager ba trei ha Nongstoin.
Shuh shuh ki lai seng ki la pynpaw ruh ba lada katei ka Kompani kam kohnguh ia ka jingdawa jong ki seng na ka liang jong kitei ki lai seng kim banse ban hap ban pynsangeh noh shwa shipor ia ka jingpyntrei jong katei ka Kompani tad haduh ban da ia pynbeit da kumwei pat.