Shah shet ka Kajol, ha ka tiktok video, pyni, ia ka dur, ba ka dang law jain

Kito kiba ia buh ia la ki jong ki dur, ha ki social media, ki hap ban ia husiar bha nangne shakhmat bad kata ka long, ba ka la mih thymmai, kawei ka buit leh tuh, kaba ki khot deepfake video bad ka Rashmika Mandanna bad ka Katrina Kaif, ki la ngat ban shah thad ialade, ha kitei ki nongthaw video bad mynta ka la ngat sa ka Kajol, ka nongak phlim ba pawnam ka bollywood.

Katei ka video, ka pyni, ba ka Kajol, ka dang law jain, ha kaba la pyni ha ka video ia katei ka dur ba katei ka aktress, ka dang law jain bad ia katei ka dur, la pyni, da ka Rosie Breen, ha kaba la pyni paidbah ha TikTok, ha kawei ka jingthoh, kaba ki ong ‘Get Ready With Me’

Katei ka video, kaba la shu thaw tuh, la pyllait paidbah ha TikTok, ha ka 5tarik Jylliew 2023, da kaba shim da ka dur jong kiwei pat bad ba la buh da ka dur khmat jong ka Kajol, ha kaba ki ong “Get Ready With Me” (GRWM).

U Narendra Modi, myntri rangbahduh, ula kren sngewkhia, halor kine ki kam leh buit tuh bad kiba lah ban pynkulmar ia u paidbah ha kano kano ka por bad u khot ia ki kotkhubor, ba kin hikai ia ki paidbah, ba kin lait na kine ki deepfakes. U Modi, u iathuh, ba ula iohi, ia kawei ka dur, kaba ki shu thaw thok, ha ka por, ba u leh Garba bad ka long thik, kum ka dur ba shisha.