Shah sangah U MLA, ka Congress na Assam, ba u tuklar ILP ha Meghalaya

Shillong:Ki sengbhalang kiba don hapoh ka shatri jong ka Confederation of Meghalaya Social Organisation (CoMSO) ha ka sngi saitjain, ki la pynlong ia ka jingtied ia ki ksing ha jaka ieng kali Jaiaw, ha Motphran kum ka dak ban pynsngew sha ka sorkar pdeng ia ka jingangnud jong ki paidbah jong ka jylla Meghalaya ban pyntrei kam noh ia ka Inner Line Permit.

Ka CoMSO ha kane ka sngi ka la tem ia ki ksing ha Motphran kum shi bynta ban pynpaw ia ka jingsngewsih ba wat la ka iing dorbar thawain ka jylla ka la pdiang ia ka rai ban pyntrei kam ia ka Bengal Eastern Frontier Regulation 1873, kaba mut ka ILP ha kane ka sngi ha u snem 2019, hynrei ka sorkar pdeng mynta la shisnem ka sngap mynthi.

Ha ka jingkren jong u bah Robertjune Kharjahrin Chairman jong ka CoMSO u la ong ba ha u snem thymmai ka jingiakhih kan dang iai bteng, katba ka sorkar pdeng kam pat ai ia ka ILP ha kane ka jylla Meghalaya.

U bah Robertjune Kharjarin, ha kane ka sngi u la thalain tyngeh ia u MLA ka Congress na Assam u Kamalakhya Dey Purkayastha, ha kaba ula ai ia ka jingthoh sha u myntri rangbah ka jylla ban ong ban da pyrkhat ar sien ha kaba ia dei bad ka jingpyntrei kam ia ka ILP ha kane ka jylla.
Na ka liang ka CoMSO ka dawa na ka MPCC ba ka dei ban thoh sha ka ACC bad sha ka AICC bad ba kin phah weng ia ka shithi kaba jong u tei u MLA na Assam.

U bah Robertjune, u la ong ruh ba kumno na ka liang jong ka Congress ha Meghalaya kam shym la leh ei ei ha kaba ia dei bad kane ka jingwan tuklar u MLA ka Congress na Assam. U la ong ruh ba kumno yn shaniah ia ka party Congress, lada ka Congress ka kyrshan pura ia ka jingdawa ILP ka dei ban dawa na u tei u MLA ba u dei ban weng noh ia ka shithi.

U bah Robert u ka ong ba kane ka jingleh jong u MLA ka Congress na Assam ka long pyrshah ia ka rai jong ka iing dorbar ka jylla Meghalaya bad la kyntu ia u lamphang ka iing dorbar u Bah Metbah Lyngdoh ba u dei ban leh ei ei ia u lem kumta dei ban weng noh ia ka bynta ka rule kaba ia dei bad ka jingkren pyrshah ia ka iing dorbar.

Kum ka dak jong ka jingpyrshah ia ka jingkuman ka sorkar pdeng ban pyntrei kam ia ka ILP, ha kane ka jylla Meghalaya ka CoMSO, ka la thang ia ka tynshop jongu myntri rangbah duh ka Ri, ia u myntri kampoh ka iing ka Ri bad kum juh ia ka tynshop u MLA Congress na Assam ba u la wan ban tuklar ha kane ka jylla Meghalaya.