Shah rat 2 tylli ki ïng, julor palat 40 ïng ba hap phria ha Erpakon

Shillong, 20 Lber:
Kumba 40 tylli ki ïng briew ki la julor na ka daw ka jinghap phria ha ka miet sngi saitjaiñ ha ka shnong Erpakon kaba don ha Ri-Bhoi district. Katei ka jingjia ka la jia ha ka por 6:30 baje mynmiet, iathuh u bah Lambor Kharshilot Secretary shnong jong ka Erpakon. U la iathuh ba ki don sa ar tylli ki ïng kiba la shah rat ha ka lyer bad kitei ki dei ka ing jong ka kong Real Nongsiej bad kong Restina Thongni. Kitei ki ar tylli ki ïng ym long sah briew shuh bad ki shna da ka dara ha katei ka jaka ban sah shipor.
Nalor ki ïng briew u bah Lam u la iathuh ba ka ïng mane jong ka balang Presbyterian ruh ka la shah ktah bad ki tin ba sop ia ka tnum ing mane ki la pei thliew lut. Kiba bun pat na ki ing ha katei ka shnong ki dei kiba la pei thliew ki tin soping, don kiba malu mala bad don kiba la julor bha.Nalor ki ing sah briew u secretary shnong u la iathuh ba ki jingthung jingtep ha katei ka shnong ki la julor lut, u Gram Sevak ba peit ia katei ka thaiñ u la hiar sha katei ka shnong mynta ka sngi ban leit jurip ia ki jingjulor, hynrei la ong ba ym pat ioh jingkheiñ lut ia baroh ki jingjulor.