Shah rahbor u nonghikai skul ha ki lehnoh

Shillong, 28 Risaw:
Uwei u nonghikai skul ba la tip kyrteng u Maliram Rabha na North Garo hills hynne ka sngi Hatmajai u la shah rahbor ha ki kynhun lehnoh. Une u nonghikai u la shah rahbor na jaka jong sah jong u na shnong Damas Kaksona ba don hajan Mendipathar kaba jngai kumba 120 km naTura.
Ki pulit ki la suba ba kine ki lehnoh ki la rahbor ia une u nonghikai sha kawei ka khlaw na shnong Chitukona. Ki pulit ki la ong ba kane ka lah ban dei ka kam jong ki Garo National Liberation Army (GNLA), ha kaba ki la pyndonkam da ka kyrteng A’chik Matgrik Tiger Force (AMTF) khnang ban lait na ka jingjah burom ka seng.
“AMTF ka dei ka kyrteng kaba pyndonkam da ka kynhun jong ka GNLA na bynta ban rahbor bad ban lute. Ka GNLA ka pyndonkam da katei ka kyrteng khnang ba ka kyrteng jong ki kan lait na jingjah burom. Kane ka dei ka kam ba la ialam da u Commander ka GNLA u Philiport”, la ong u SP ka North Garo Hills u Jerry Marak.
U SP u la iathuh ba hynnin ka sngi, ia u Philiport bad hynriew ngut ki dkhot ka GNLA la iohi da ki paidbah katei ka thain katba ki dang ia iaid ha kawei ka khlaw ha shnong Matchakol hajan Damas.
“Ki nongshong shnong ki iohi ba ki dkhot ka GNLA hynne ka sngi ki ia iaid ha kawei ka khlaw hajan shnong Chipakram”, la ong u SP.
U Marak u la iathuh ba kine ki dkhot jong ka GNLA ki la pynjur ia ka jingrahbor na bynta ban dawa pisa ha kine ki bnai ba dei ka samoi lehkmen.
“Ka jingkhang tih dewiong ka la ktah jur ia ka pla tyngka jong ki lehnoh, dei na kane ka daw ba la pynlong ia ki ban rahbor pathar ia ki paidbah ban dawa pisa”, la ong shuh shuh u SP ka North Garo Hills.
Kiba haiing hasem jong u Rabha haduh mynta kim pat shym ioh ia ka shithi halor ka jingdawa pisa ki lehnoh, la bynrap u SP.