Imphal: U Junior Commissioned Officer (JCO) jong ka Indian Army, ula shah rahbor na ka iing sah jongu, ha Thoubal District jong ka Manipur, ha ka sngi thohdieng; hynrei, la ioh ban pyllait im noh ia u, hadien 9 kynta. La iathuh, ba ki don ki riew runar, kiba la leit rung ha ka jaka sah jong U JCO Konsam Kheda Singh ha Charangpat Mamang Leikai, ha ka por 9baje mynstep bad ki la rahbor ia u bad la iathuh ba kitei ki runar, ki leit rung da ka kali bad tan jubor ia U Kheda Singh hapoh kali bad ki sa phet bak, na katei ka jaka. La ioh ban pyllait im, ia U Kheda, ha ka por 6.30 hynnin ka janmiet, ha kaba la leit ialam ia u, sha Waikhong Police Station ha Thoubal district.
La iathuh, ba kitei kiba rahbor, ki dawa pisa na U Kheda Singh, namar ba ka la don ka jingshah byrngem jong kiba ha iing jongu, ha ki khyndiat sngi ba ladep.
Ki pulit, ki la pynlong ia ka jingleit thwet ia U Kheda Singh bad la talasi ia kiba bun ki kali, ha ka surok bah National Highway 102 bad la iathuh ba utei u shipai, u dei uba don ha ka shuti, ha kaba ki runar, ki ioh lad ban leit rahbor ia u, na ka iing sah jongu.
Khyndiat sngi mynshwa, lah ban pynkynmaw ba uwei u heh pulit, ula shah rahbor, na ka iing sah jongu, ha ka 27tarik Rymphang 2024, ha kaba ki don kumba 200ngut ki ehrang, kiba leit rung ha ka iing sah jong U Additional Superintendent of Police, U Moirangthem Amit Singh, ha Imphal West district, ha kaba ki la rahbor ia u.
Phi don ban ong eiei?