Shah rahbor 6 ngut ki nongtrei, u nongkhaii dewiong

Shillong, 14 Jylliew:
Hynriew ngut ki nongtrei uwei u nong khaii dewiong ha ka thain Nangalbibra ka  South Garo Hills ki la jah kynsan ha kane ka sngi Thohdieng janmiet bad la suba jur ba ki la shah rahbor ha ki runar.
Kine ki hynriew ngut ki nongtrei mashin ki dei jong u Natmal Sharma, uba dei u nong khaii dewiong uba ju leh ia ki kam khaii na Nangalbibra sha Jogi gopa ha Goalpara district ka Assam.
Ki pulit ka South Garo Hills ki la iathuh ba hynriew kine ki nongtrei kiba shah rahbor ki don ka jaka trei ha shnong Pattargittim kaba don ha Nangalbibra ki dang shong thait ban ialehkai kot ha ka por 10:30 mynmet.
Hynrei ynda la leit peit kum mynstep, la shem ba kine ki la jah klep watla ki tum ki tam jongki ki dang don ha katei ka jaka.
Ki pulit ki la pynlong ia ka jingkhynra kaba jur halor kane ka jingjia ban lap ia kiba shah rahbor bad ban kem ia kiba donkti.
Ha kine ki sngi ba la dep, ki suba lehnoh jong ka GNLA ki la rahbor ia uwei u manager jong u nongkhaii dewiong u Natmal Sharma na shnong Depa Garat ha Dainadubi ka North Garo Hills.
Ia u Manager ka kompeni jong u Sharma u Banwarilal Joshi la ioh ban pynlait im da ki pulit hadien shi sngi na shnong Bangsi Minol kaba don hajan ka Dainadubi.