Shah rah 2 ngut ki KSU, ba suba thang ia u trai dukan Motphran

Shillong, 10 Risaw:
Ki pulit ki la rah ar ngut ki dkhot ka KSU Mawprem halor ka jingsuba ba ki donkti ban thang ia u trai dukan kaba don ha Motphran hynnin ka sngi.
U trai ka dukan Meghalaya Machineries u Bikash Nandwani u la shah kynshait da ka petrol hynnin ka shiteng sngi katba u dang shong ha dukan. Haba pynthikna ia kane, u SP ka East Khasi hills district u Bah Mariahom Kharkrang u la iathuh ba ki ar ngut ki dkhot ka KSU kiba dei ki dkhot executive member ka KSU Mawprem circle kynthup u Wankerlang Jyrwa (24) bad u Badonkupar Nongbri kiba dei na Lower Mawprem ki la shah rah mynta ka sngi, ha ki pulit ban pynlong ia ka jing tohkit.
Lah ban kdew ba u Vikash Nandwal u la mynsaw jur hadien ba ka ding ka la kem ia ka met jongu hadien ba ki runar hynnin ka sngi ki la kyn shait da ka petrol bad wiang ding artad. Mynta u don ha jingshah sumar ha Guwahati.
Ha kajuh ka por ka Meghalaya NCP mynta ka sngi, ka la pynrem jur ia ka jingshah thang u Vikash Nandwal u trai dukan ka Meghalaya Ma chineries uba shah kynshait da ka petrol hynnin ka sngi ha ki runar katba u dang shong ha dukan.Ha ka jingialang ba la pynlong hynne ka sngi ka NCP ka la ong ba kum kane ka jingleh riew khlaw ym lah ban pdiang ha kane ka juk shai mynta bad na ka liang ka party ka la dawa ba ki bor district ki dei ban ai da ka jingsneng kaba tyngeh ia kitei ki runar ki ba leh ia katei ka kam khnang ba hadien habuh kan nym jia shuh.
Ka party ka la ong ruh ba kum katei ka jingjia ka wanrah ia ka jingbym shongsuk shongsain jong ki paidbah ha kane ka jylla. “Dei ban ai ia ka jingpynshitom ba tyngeh ia ki runar katkum ka ain”, la ong NCP.
Ka CSWO hapoh ka jingialam ka kong Irene Hujon ka la pynrem jur ia ka jingshah kawang Petrol bomb ka dukan u Vikash Nandwal kaba don ha Motphran mynhynnin ka sngi bad kumjuh ruh ka jingsynreit sharak u nongbylla ha NEHU .
Ka CSWO ka la kyntu ba kik samla kim dei ban leh ia kum kitei ki kam bad ka la ong ruh ba ka jingdawa na ka bynta kano kano ka mat ka iaid la ka jingdawa hynrei banpynjot pynum ia ka long ka pyrshah bad ka bym lah ban pdiang.