Shah pynshad shrieh, kiba ha iing U Bah Che, kum u cock badminton, halor ka jingiap U Bah Che

Shillong:Ki pulit na Mawlai mynhynnin ka sngi, ki la khot ban pynshai ia ka iing ka sem jong u bah Cheristerfield Thangkhiew, halor ka kaiphod shah pyniap ia u bah Cherish, ha ryngkat ka jingbud synranlang jong ka Sur ka bri u Hynniewtrep.

Halor kane ka jing shah pyniap u bah Cherish, ka sur ka bri u hynniewtrep ha ryngkat ka iing ka sem jong u bah Che, ki la leit ha ka 25 tarik ha Sadar police station ban buddien ha kaba iadei bad kane ka kam.
Ha ka jingiakren bad u bah Donbok, ula ong ba ka jingthmu jong ka sur ka bri u hynniewtrep, ki la thmu ban leit ia kynduh ia u Investigation Officer, u bah Jef Suting, hynrei na ka liang jong u Officer incharge ka Sadar Police Station, u ong ba ia kane ka case shah pyniap u bah Che, ki la dep ban aiti ha Mawlai Police station, namar une u Investigation Officer uba shim jingbah khlieh ia kane ka case jong u bah Che, u la shah kynriah kam noh sha South Sudan.

Kumta na ka liang Ka Sur Ka Bri u hynniewtrep, myn ha ka step jongka ka 4 tarik Naiwieng, ki la wan ban kynduh ia ka Officer Incharge jongka Mawlai Police Station, hynrei ka jingiakren, kam shym la pynhun ia ki, ong ubah Donbok.
Ka jingpoi jong ka Sur Ka Bri U Hynniewtrep, ha kane ka jaka ka long kum u Cock Badminton, namar napoh Sadar laphah sha Mawlai bad na Mawlai pat ki ong une u IO ba la shimti thymmai lane kum u IO ban buddien ia ka case u shong hapoh Reserve Police u Subir Sangma, ba dei ruh u DSP.

U bah Donbok ula ong ruh ba ka jingleh jongki pulit ka dei beit ban pynslem kai bad ban pynjah klep khnang ba ki paitbah kin klet. Kum ka kynhun, ki la ong ba kin nym shongthait bad kin ym sangeh, katba ym pat ioh ia ka jingbishar hok jong ka iing ka sem u bah Cheristerfield Thangkhiew.