Shah pynsangeh ki nongleit jingleit, kumba 90ngut na kad liengsuin Umroi ban leit sha Aizawl

Shillong:Ki nongleit jingleit na kad liengsuin Umroi, kiba dei ban leit mynta ka sngi sha Aizawl, Mizoram, ki la shah pynsangeh noh, da kaba aidaw, ba ka don ka jingthut jong ka mariang.

Na ka jingiakren bad ki katto katne ngut kiba don ha katei ka liengsuin, kiba la pyntip sha U Rupang, ki iathuh, ba ki don kumba 90ngut eiei, ki nongleit jingleit, kiba la poi ha katei ka kad liengsuin, naduh ka por 11.30 mynstep bad katei ka liengsuin Alliance Air, ka dei ban mih, ha ka por 12.50baje nohsngi; hynrei kam shym la biang por satia bad ka dei ha ka por 2.30 nohsngi, ba ki nongleit jingleit, ki la rung sha la ki jaka shong, hynrei ha shwa ba kan mih na kad liengsuin, u nongniah, ula pyntip, ba ka liengsuin, kam lah ban mih, namar ba ka don ka lyeriong sha ki bynta jong ka Aizawl bad kumta, la pynpep noh ia katei ka jingleit, ha ka por kumba 3baje tam.

Ym tang katta, hynrei la phah mih noh ia ki nongshong liengsuin, ba kin ap ha kawei ka kamra, ha katei ka kad liengsuin Umroi bad hangta, la bthah ba kin pep noh 8ngut na kitei kiba dei ban leit, namar ba lada ka don ka jingthut jong ka mariang, kumta ka liengsuin, kan leit phai sha Guwahati. Hadien kata, ki don 12ngut kiba la rai ban pynpep noh ia ka jingleit, hynrei, haba ki la poi sha ka 12ngut ruh, katei ka liengsuin, kam treh satia ban leit, namar ba ka donkam tang 8ngut ba kin sangeh noh bad kumta ka jingleit ka la shu pulom ei khamakha.

Kitei ki nongleit jingleit, ki la kren diaw mynsiem jur, halor katei ka jingleh jong ka Air Alliance, namar ba ki la duh ban leit sha ka jaka kaba ki thmu bad nangta, ba ki la shu ia pynlut por kai ha katei ka liengsuin, haduh 4.30 nohsngi, kaba la poi sha ka hynriew kynta antad.

Na kitei ki nongleit jingleit, ki don ruh kiba mut ban leit shim bynta sha ka jingiaseng jong ka Presbyterian Church of India (PCI), kaba dei ban long ha Mizoram bad la iathuh ba ha shwa jong katei ka por 2.30 nohsngi, ki don ar tylli ki liengsuin, kiba leit sha Guwahati bad sha Kolkata, kiba la mih na katei ka kad liengsuin, khlem kano kano ka jingshah pynwit.