Shah pynpra bad khang ka jaka ‘Thang Briew’ ki Hindu

Nongpoh, 26 Jymmang: Ki nongialam khmat jong ka Hindu Society, Nongpoh, ki la pynpaw ia ka jingpyrshah kaba jur halor ka jingshah pynpra jubor bad khang syndon da ki katto katne ngut ki briew ia ka jaka ‘Thang Briew’ kaba don harud jong ka surok bah 4-lane hajan ka shnong Pahamrioh, Ri Bhoi District.
Haba iadei bad kane na ka liang u Unteshwar Singh, President ka Hindu Society Nongpoh, u la ong ba hadien ba ki la iohpdiang ia ka shithi kaba don ia ka muhor ka Raid Nongkhrah bad ka Sign jong u Bah D. Syngkli, uba dei u General secretary ka Raid Nongkhrah, Nongpoh Elaka Sirdarship bad ha katei ka shithi la kam ba ia katei ka jaka ‘Thang Briew’ kaba don ha kjat jong u Lum Lawkyntang jong ka Raid Nongkhrah, ka dei kaba la long trai da u Bah Rodney Syngkli.
Haba kren sha ki nongthohkhubor, u Uteshwar Singh, u la ong ba ka Hindu Society Nongpoh, ka dap da ka jingsngewkhia halor jong katei ka jingshah pynpra bad shah khang syndon ia katei ka jaka ‘Thang Briew’, khlem da don kano kano ka jingpyntip sha ki nongialam jong ka Hindu Society Nongpoh.
U la ong ruh ba ka Raid Nongkhrah, ha u snem 1999 ka la dep ban ai ia ki kot ki sla ban pynshisha ba ia katei ka jaka ‘Thang Briew’ kaba don ha 29 Mile, Pahamrioh, la lah ban longtrai da ka Hindu Society ban pynlong ia katei ka jaka kum ka jaka ‘Thang Briew’, na ka bynta ban thang ia ki metiap, hynrei mynta ka long kaba pynlyngoh ba hadien ba la ioh pdiang ia katei ka shithi kaba kam ba ia katei ka jaka la longtrai mynta da u Bah Rodney Syngkli, ong u Uteshwar Singh.
Hadien ka jingshah pynpra bad shah khang ia katei ka jaka Thang Briew, ka Hindu Society Nongpoh, ka shem jingeh lada wan kino kino ki jingiap jong ki briew na ka Niam Hindu, namar kim don jaka ban thang ia ki metiap hadien ka ka jingshah pynpra noh ia katei kaba la don slem ha katei ka jaka, la bynrap u Uteshwar Singh.Haba shimkhia halor jong kane, na ka liang jong ka Hindu Society ki la buh syndon da ka FIR ha Nongpoh Police Station, pyrshah ia u Bah Rodney Syngkli bad ia u Bah D.Syngkli secretary ka Raid Nongkhrah, hadien ka jingpynpra bad ker ia katei ka jaka ‘Thang Briew’, ha kajuh ka por ka Hindu Society Nongpoh, ka la dawa na ki bor jong ka Ain ba kin leh katkum ki kyndon jong ka Ain pyrshah ki kitei kiba donkti ha katei ka jingpynpra bad khang ia ka jaka ‘Thang Briew’ kaba don ha 29 Mile Pahamrioh.