Shah pynphai ki kali na West Khasi, Bhoi ban rung sha Shillong

Shillong:Mynta ka sngi ki kali kamai sumo na ki thain Ribhoi kiba thmu ban wan kiew sha Shillong ki la shah pynphai noh ha ki pulit ki ba ap pahara ha ki bynta jong ka Viewpoint ka ba don ha Mawiongrim. Kumjuh ha ki bynta jong ka west khasi hills ki don ki kali kamai ki ba mut ban kiew sha Shillong ki la shah bat bad pynphai noh tang ha Mairang.

Kane ka jingshah pynphai ki kali, ka long hadien ba na ka liang u Commissioner & secretary jong ka tnad transport u bah MR Synrem mynnin ka sngi u la pynmih ia ka jingpynbna ban ym shah ia ki kali kamai ban iaid na kawei ka district sha kawei pat bad kane ka long kum shibynta ban iada na ka jingsaphriang jong u khniang jingpang Covid-19 ha ka jylla, ha kaba ki la khang ban pyndonkam ia ki Kali kamai kum ki bus, ki Tourist taxi, maxi cap ki kali sumo.