Shah pynliem ka Mawlai ha ka Langsning

Shillong, 13 Jylliew:
Ka Mawlai ka la shah pynliem ha ka Langsning ha ka jingiakhun hynne jong ka lympung U-19 Shillong Premiere League.
U Joey Khongwir u la khyrwit haduh san kol ia ka Langsning ban jop kput haduh 8-1 kol pyrshah ia ka Mawlai ha ka jingiakhun hynne ka sngi ha JN Stadium.
U Joey u la thep ia ka kol ba nyngkong tang hadien saw minit ba la sdang ka jingialehkai bad pynbud biang tang hadien ar minit.
Ka Langsning ka la pynjam jem haduh 6-1 kol ha ka kylla step bad ka la long kaba eh than ia ka Mawlai ban pynphai kylla.
U Joey u la thep san kol tang ha ka kylla step bad kane ka la jia tang hapoh ka 27 minit katba u Lenningstar Kynter u la thep shi kol ha ka 45 minit. U nongialehkai ka Mawlai u Samborlang Nongbri u la pynlait ban leit thylli ia la ka kynhun da kaba thep shi kol ha ka 32 minit.
Ha ka kyllamiet, ka Langsning ka la ioh biang ban thep da u Raymond Kharbuli (50”) bad u Damehun Syih (64”).
Ka Langsning ka la pynshad kai ia ki nongialehkai jong ka Mawlai. Ka Mawlai ka la rem la ar sien katba ka Langsning ka la kami lai point da kane ka jingjop watla ka la shah rem ha ka jingiakhun ba kham mynshwa.
Lashai ka jingialehkai kan long hapdeng ka Malki pyrshah ia ka Nangkiew Irat por 4 pm.