Shah pynliem ka Lajong 2-3 kol ha ka Minerva

Shillong: Ka Minerva Punjab ka la pynliem ia ka Shillong Lajong da 3-2 ha ka jingiakhun jong ka lympung Hero I-league kaba long mynta ka sngi ha madan Tau Devi Lal Stadium ha Chandigarh, Pynjab.

            U Guy Dano ka Minerva u la thep ia ka kol katba u Bali Gagandeep u la thep ar kol katba ia ka Lajong la thep da u Daniel Odafin bad u Laurence Doe.

            Mar ia sdang ka jingialehkai, ka Minerva Punjab ka la thep noh ha ka  5 minit da u Guy Dano bad sa kawei la thep da u Bali Gagandeep hashwa ban kut ka kyllastep.

            Ka Lajong ka la bujli noh ia u Lalrohlua da u Alen Deory ha ka kyllamiet.

            U Daniel Odafin u la ioh ban thep ia ka Lajong ha ka 60 minit ban pynduna ia ka jingkhein ba la sah thep. 

            Bad ha ka 64 mini u Laurence Doe u la pyniakhaid ia ka Lajong hynrei ka Minerva ka la knieh ia u nam tam ha ka 80 minit da u Bali Gagandeep.

            Kane ka la pynjem jai ia ka Lajong haduh ba kan shah rem noh syndon ha kane ka jingiakhun khlem lah ban leh eiei shuh.

Kane ka dei ka jingshah rem kaba lynter ia ka Lajong ha ka jingiakhun ha kane ka I-League khamtam ha ki jingialehkai shabar na la iing.

            Ka Lajong mynta kan hap ban leit sha Coimbatore ban iakhun ia ka Chennai City FC ha ka 11 tarik Rymphang  2018 bad kane ka dei ka jingialehkai kaba donkam bha ia ka Lajong ba kan ioh ia ka jingjop.