Shillong: Ka East Khasi Hills District ka la shah pynliem ia ka All Jaintia Cricket Association da 182 run ha ka jingiakhun ka Inter District U-23 Men ha kaba ïa dei bad ka Zone 2 kaba la pynlong lem bad ka jingïatreilang bad ka Ri Bhoi District Cricket Association mynta ka sngi ha ka madan ïalehkai jong ka Umbuda, ha Nongpoh.
Ha ka jingïakhun kaba ar jong kane ka lympung ha ka Zone 2, ka All Jaintia DCC ka la jop ïa ka toss bad ka la kam trai beit ban tied shwa bad hapoh ka 40 over kane ka kynhun ka la ïoh ban kamai haduh 289 run da kaba hap noh 7 wiket bad u nam tam ba la tied bun run u dei u Mewada Shylla 94 run na ki 81 ball bad u Ebormi Sutnga 50 run na ka 73 ball katba u nongkawang ball na ka East Khasi Hill u ba la ïoh bun wiket u dei u Ram Diengdoh u ba la ïoh 2 wiket bad u Ribok Ita 2 wiket.
Haba wan ban beh ïa katei ka thong ba la buh da ka All Jaintia DCC, na ka liang ka East Khasi Hills DCC ka la lah ban kamai tang 107 run hapoh ka 22 over bad ban hap lut baroh ki wiket, ha kaba u Sandystone Kharshandy u la ïoh kamai 33 run na ki 30 ball, u Kishan Lyngdoh 22 run na ki 7 ball katba ki nongkawang ball na ka All Jaintia kiba la ïoh khur bun wiket u dei u Welmanson Passah u ba la ïoh 4 wiket bad u Heipormi Laloo 2 wiket, bad ha kane ka jingïakhun ka All Jaintia ka la ïoh khur ïa ka namjop kaba nyngkong da 182 run pyrshah ïa ka East Khasi Hills DCC.
Ha kaba ïa dei bad kane ka lympung ïalehkai kriket jong ka Zone 2, na ka liang ki bor ka MCA ki la hap ban pynsangeh noh shwa shipor namar ka jingpynmih ïa ka hukum da ki bor pynïaid ka district halor ka jingsaphriang sted ka jingpang jong u Corona Virus lane u COVID 19, bad ïa kane ka lympung yn lah ban pynïakhun biang tad haduh ba la pynmih biang da kawei ka hukum, la pyntip da ki bor ka RBDCA.
Phi don ban ong eiei?