Shah pynkup burom u nongshna phlim Khasi ha ka sorkar

Shillong, 17 Jylliew:
U nongshna bad u nongpynmih phlim Khasi ki la shah pynkup burom hynne ka sngi Hatmajai ha ka sorkar. U Myntri Rang bah ka jylla u Dr. Mukul Sangma u la pynkup bu rom ia u Director Bah Pradip Kurbah bad u nongpynmih u Bah Ribiang Tlang bad ka kynhun kaba la jop ia ka National Award (Rajat Kamal Award) na ka phlim Khasi kaba kyrteng ka ‘Ri’. La pynlong ia ka jingpynlup burom hynne ha ka jingialang ba la pynlong da ka Information and Public Relations ha
U Soso Tham Auditorium, Shillong. La pyni ruh ia kane ka phlim ha kane ka sngi. Ha kane ka jingialang la sakhi lang u Bah A.L. Hek myntri ka Information and Public Relations, ka Kong Roshan Warjri ka myntri kam pohiing, ka Kong Ampa reen Lyngdoh ka myntri sor, u Bah P. B. O. Warjri u Additional Chief Secretary, ka M.H.K. Marak ka Commissioner and Secretary I&PR nalor kiwei ki heh sorkar bad ki paidbah.
Haba kren ha kane ka jingialang u Dr. Sangma u la khublei ia u Bah Pradip Kurbah bad ka kynhun jong u kaba la jop ia ka khusnam ha ka ri na ka phlim Khasi ka ‘Ri’ bad u la kyrmen ba kane ka jingjop kan long kum ka jingktik ia ki samla ba kin phai khmat sha kane ka kam phlim na ka bynta ka jingmyntoi jong ki jylla.
“Ka kam shna phlim ka dei ka bynta kaban plie lad ha ka ioh kam ioh jam jong ki samla ha ki snem ban wan bad kan wanrah ruh ia ka roi ka par jong ka jylla”, la ong u Dr. Sangma. U la ong ba ka jylla kam pat lah ban sei ia ki sap ha kane ka liang hynrei ka sorkar kan shim ia ki lad ki lynti ban kyntiew ia kane ka kam shna phlim.
U Myntri Rangbah u la ai ruh ia ka jingsahkynmaw sha u Bah Kurbah bad ka pisa kaba T.10 lak.
Shwa ia kane, u Bah Hek u la iaroh ia u Bah Kurbah uba la shim ia kane ka lynti ban kyntiew ia ka phlim Khasi haduh ba kan ioh ia ka khusnam ha ka ri na ka 61st National Film Festival.