Shah pyniap u nongap pahara ka kompeni ha Byrnihat

Nongpoh, 21 Iaiong:
Ha kawei ka jingjia shah pyniap kaba la jia hynnin ka miet ha ka shnong Rajabagan, kaba don ha ka thain Byrnihat Ri Bhoi District, uwei u bar jylla u la shah pyniap dusmon ha ki riew runar ki bym shem la lah satia ban ithuh, ha kaba ia ka met iap jong u la lap hynne ka step ha ka por 6:30 ei ei mynstep.
Ka tyllong khubor na ki Pulit ka Ri Bhoi, la iathuh ba utei u bar jylla uba la shah pyniap dusmon la tip kum u Simanta Bordoloi (45) na ka shnong Chandrapur, Kamrup District jong ka jylla Assam bad ula wan trei bylla kum u nongap pahara, ha kawei ka Karkhana sain nar kaba la tip kum ka Shyam Century Ferrous Ltd, kaba don ha ka Rajabagan, Ri Bhoi District.
La iathuh ruh ba utei u bar jylla, u la wan trei ha katei ka Karkhana sain nar kum u Nongap pahara bad hynnin ka miet u don ia ka ka map miet kaba sdang naduh ka por 10:30 haduh ka por 6 baje mynstep, hynrei tang ha ka jaka trei ruh um pat poi utei u briew, u la shah pyniap noh ha ki runar bym lah satia ban ithuh.
Ki Pulit ki suba jur ba ki runar kiba la pyniap ia utei u bar jylla, ki la pyndonkam da ki kynja tiar, namar kat kum ki dak mong ia kaba la sakhi utei u bar jylla uba la shah pyniap, la don bun jaka ki dak mong ha ki bun bynta jong ka khlieh bad ki durkhmat.
Kumta na ka liang ki Pulit, hadien katei la pynkit noh mar mar sha ia ka metiap sha Civil Hospital Nongpoh, na ka bynta ban pyndep iaka post mortem bad ka jingtohkit ban lap ia ki briew ba donkti halor kane ka jing jia ka dang iaid shakhmat.