Nongpoh: San ngut ki runar kiba la shah kynnoh ba ki la donkti ha ka ban rahbor bad pyniap klep ia uwei u khynnah ba dang 15 snem, hynnin ka miet ki la shah kem noh ha ki Pulit ka Ri Bhoi.
Kitei ki san ngut kiba la shah kem noh ha ki Pulit, ki dei kiba la tip kyrteng kum u Darius Marak, u Jackius Marak, u David Sangma, u Paulus Marak bad u Attai Marak, kiba dei ruh ki rangbah kiba sah ha ki shnong kiba sah hajan jong katei ka shnong jong utei u khynnah.
Lah ruh ban kdew hangne ba ha kine ki Taiew ba la dep, utei u khynnah ba dang 15 snem na ka shnong Nagrabil, ka shnong kaba don ha ka thain Umtyrnga, u la jah noh khlem da wanphai shuh sha la iing na ka jaka kaba u leit jingiaseng.
Ka jingpynshisha halor ka jingshah rahbor ia utei u khynnah, ka dei hadien ba la don kiba la phun sha kiba ha iing, ha kaba ki la dawa haduh T. 1 klur na kiba ha iing jong utei u khynnah, na ka bynta ban pynllait noh ia u.
Hynrei u Lyoh uba dum u la wan ban tap ia ka longiing jong utei u khynnah, namar hynnin ka sngi ki la ioh jingtip ba utei u khynnah u la shah pyniap dusmon noh ha ki riew runar kiba la rahbor ia u.
Haba iadei bad ka jingshah pyniap ia utei u khynnah, la ioh jingtip ba kitei ki runar ki la lehbein shaba palat hashwa ba kin pyniap ia utei u khynnah ba dang 15 snem, ha kaba la iathuh ruh ba ka rukom pyniap ia u ka la long shaba palat pud, ha kaba la ioh jingtip ba ki runar kiba la donkti ha katei ka kam riewkhlaw, ki la bom da ki kynja dieng ia ka met ka jong u, ha ryngkat ka jinglymthem da ki kynja maw na khlieh jong u, haduh ba kan da pra hi phom.
La ioh jingtip ruh ba kitei ki runar, tang mar ia dep ban pyniap ia utei u khynnah, ki la leit ban buhrieh bad tep ha kawei na ki par maw (Stone Quarry) kaba don ha katei ka thain Umtyrnga.
Halor ka jingiohkem ia kitei ki 5 ngut, la iathuh ba ki Pulit tang mar iatip halor ka jingshah rahbor ia utei u khynnah, ki la buddien da kaba kylli pyrthew na baroh ki briew kiba isuba donkti, kumta ha ka jingtohkit uwei hadien uwei pat, ki la ioh ban bat ia arngut ki briew kiba la suba donkti ha katei ka kam bad kiba la phla ruh ba ki la donkti ha katei ka kam bad ki la leit ban ialam sha ki Pulit sha katei ka jaka kaba ki la tep ia utei u khynnah.
Haba iadei bad katei ka jingjia pyrshah ia utei u khynnah, ki Pulit ka Ri Bhoi, kin dang pynlong ia ka jingtohkit kaba jur, na ka bynta ban nanglap shuh shuh ia kiwei pat kiba donkti lang ha katei ka kam ki riew runar, kiba la pyniap bein ia u khynnah ba dang 15 snem ka rta.
Phi don ban ong eiei?