Shah pyniap u draibar trok

Nongpoh,
20 Jymmang:
Ki runar kiba ym lah ban tip ki la rahbor ia kawei ka trok bad shoh pynmynsaw ia u draibar bad u nongbud jong ka, katei ka jingjia ka la jia ha ka 13 tarik mynta u bnai.
Ha katei ka jingjia, u draibar jong katei ka trok u la shah pyniap bad ia ka metiap jong u la lap hynnin ka sngi na Shangbangla, Ri-Bhoi district, da ki pulit, kaba la pyut bha, katba ia u nongbud jong ka la lap da ki pulit ba u dang iaid makia ha ki bynta jong ka district, hadien ba u la lait salit na ka jingshah pyniap, katba ia ka trok pat ki runar ki la rahbor ia ka bad ym tip shaei ka don haduh mynta.
Katei ka trok ka dei kaba kit rynsun na ka jylla Madhya Pradesh, bad katei ka jingjia ka la jia ha ki bynta jong ka thaiñ Rangia Chanmari K Beash, Assam, la iathuh u nongbud jong katei ka trok. U draibar la tip kyrteng kum u  Jaswant Singh (40) bad u nongbud la tip kyrteng kum u Sanju Kumar Singh (28), kiba dei na ka jylla Jammu & Kashmir, katei ka trok ka don ia u registeration nombar RJ 19 GB – 4584.