Shah pyniap u draibar na Jowai, ha ki runar ha Assam

Jowai, 21 Nohprah:
Ki pulit Assam jong ka Kalain Outpost kaba jngai kaba jngai katto katne Kilometer na Malidor ki la ioh tam ia kawei ka met iap kaba dei jong uwei u driver taxi ha Jowai uba la leit buh ia ki lai ngut ki briew kiba la suba jur bad ki dei ki riew runar kiba la pyniap ia u bad rongtuh ia ka kali.
Ka khubor kaba la iohlum ka la iathuh ba ha ka sngi Saitjain ki la don 3 ngut ki briew ki bym lah ban ithuh ki la shimwai lane book ia katei ka kali Tourist Taxi Maruti Alto rong lieh, kaba don ia u No. MLO4C-1062 kaba la niah da u Sorki Bang, uba la shah pyniap bad ia ka met la lap hynnin ka sngi U Blei.
Ki la shimwai ia katei ka kali na Stand War ha ka por 2 baje janmiet la iathuh u trai kali, Ricky Challam na Iongpiah Jowai haba ujor sha ki pulit ka nongbah Jowai.
Utei u Sorki Bang u la leit book ha ka sngi Saitjain por 2 baje, u trai kali u la wan ujor sha ki pulit hynnin ka sngi Saitjain bad ia ka metiap jong utei u briew ruh la lap hynnin ka sngi U Blei ha kaba la ioh bat ruh ia ka kali na Patharkandi, Karimganj District ha ryngkat bad uwei u ba niah ia katei ka kali uba la tip kyrteng kum u Emi Nongpluh.
Ki pulit na ka nongbah Jowai ha ryngkat ki ba haiing jong u Sorkar Bang uba dei na ka shnong Mystem kin hiar sha Kalain bad ruh u trai kali bad ki pulit sha Karimganj ban tohkit bad ban leh ia kaba donkam halor katei ka jingjia.
Ka khubor ka la iathuh ruh ba ia katei ka kali la ioh bat da ki briew ka State Bank of India namar kadei ka kali kaba dang shahram ha ka bank ha kaba ki la ujor sha ki pulit ka Patharkandi PS bad ki la kem ia ka ha ryngkat utei u Emi Nongpluh.