Shah pyniap ka tymmen 80 snem, hapoh iing ha Mawprem

Shillong, 13 Nailar:
Kawei ka tymmen kaba la 80 snem karta kaba la tip kyrteng kum ka kong Hormon Sun, ka la shah pyniap hapoh ing jong ka hi mynhynin ka miet. Ka kong Hormon ka shong ka sah marwei hi ha ka iing Ar mala jong ka kaba don ha Block I , Lower Mawprem. Katei ka ing ka kong Hormon ka dei kaba la rim bha, ha ka bynta kaba sha khrum ka ai wai bad ha jrong pat sha ka liang ka diang u sah u pyrsa jong ka katba sha ka mon pat u sah u khun jong ka bad ialade ka sah ha ka kamra kaba hapdeng.
La lap ia ka metiap jong ka kong Hormon mynta ka step da u pyrsa jong ka, ha ka por ba u mut ban leit peit ia ka, bad la lap ba ia ka met jong ka la klun da ka nep kup thiah ha madan ing bad la lap ba ki slipar jri ba ka phong shilliang ka don shawei bad sa shilliang shawei pat.
Tang mar ia lap ia katei ka metiap u pyrsa jong ka u la pyntip sha ki pulit, bad hadien katto katne por ki pulit ki la poi sha katei ka jaka. U SP City (Crime) u bah Vivek Syiem u la ptnthikna ba katei ka jingjia ka dei kaba jingshah pyniap ha ki snar nongtuh. U la ong ba ka don ka dak kaba pyni ba la pyniap ia katei ka tymmen da kaba shu tied na khlieh jong ka.
U la ong ba ha katei ka jingjia la suba ba ki nongtuh ki la ioh khung da ki phew hajar tyngka na katei ka tymmen. U la iathuh ruh ba ki nongtuh ki la pajut ruh ia baroh ki jingdeng ksiar kiba don ha ka met jong katei ka tymmen kaba la 80 snem karta. Katkum ka jingiathuh u SP City u la ong ba katei ka tymmen ka dei kaba dang shait dang khlain bha bad ki pulit kim shym la lah ban pynthikna ia ka por ba la jia katei ka jingjia hynrei ki la antad ba ka dei ka jingjia kaba la jia hapdeng ka jingdum jong ka miet kaba lah ban long hapdeng jong ka por 11 baje mynmiet haduh shuwa ban kynjat shai ka bneng.