Shah pyniap dusmon ka khynnah skul ha ka shnong Mawsaw

Shillong, 6 Jylliew:
Kawei ka khyn nah skul kaba dang shong klas X na ka shnong Mawsaw ka la shah pyniap dusmon ha ki runar ki bym lah ban tip. Katkum ka tyllong khubor kaba la ioh lum la iathuh ba katei ka khynnah ka la shah pyniap ha ka miet sngi saitjain ka 4 tarik u jylliew hynrei la lap ia ka metiap jong ka mynhynnin ka sngi u Blei ha ka por 1 baje eiei mynsngi.
Katkum ka jing iathuh ki lad khubor la ong ba ha katei ka miet katei ka khynnah ka la mih na ing ha ka por 7 baje myn miet ban leit shaw ia ka kmie jong ka na dukan ba ka die jingdie, hynrei naduh ba mih na ing ka khlem wan phai ing shuh hynrei la lap pynban ia ka metiap jong ka ha ka sngi u blei. Ha ka por ba la lap ia ka metiap la iathuh ba ki runar ki la pynsdien phasi da ka jain jong ka ha uwei u dieng, hynrei la ong ba na ki dak ki shin kiba paw la ong ba ka dei ka jingshah pyniap bad la ong ruh ba ha shuwa ban pyniap la batbor ia ka.
Katkum ka jingiathuh ki lad khubor ki la ong ba ka lynti na ing katei ka khynnah sha dukan ka kmie jong ka ka jngai kumba 10 minit eiei bad kam shym dei ka lynti khlaw hynrei ka shu long kynjah namarba ka ia jngai ka ing sah briew. Katei ka khynnah na ka shnong Mawsaw- ka shnong kaba don harum Mawthawpdah ka lynti ban leit na Nongstoin sha Mawkyrwat ka dei ka khynnah ba dang shong klas X ha ka skul Seven Sisters Secondary School, Domrua. Ki lad khubor ki la iathuh ruh ba ki pulit ki la ioh ksai ia kiba donkti ha katei ka jingjia ha kaba la ong ba haduh mynta uwei u briew uba na katei hi ka shnong u la shah kem ha ki pulit bad ka jingtohkit ka dang iaid shakhmat.Halor katei ka jingjia ba sngewsih ka KSU Mawkyrwat Circle kan deng lama iong kum ka dak ka jingsngewsih bad kumjuh ruh ka jingpynrem ia kiba donkti ha katei ka kam. Ka KSU kan pynlong ia katei ka jingiarah lama iong bad ka jingiaid paidbah ha ka 11 tarik mynta u bnai ha ka por 10 baje mynstep sdang na phyllaw jong katei katei ka skul shaduh sha Mawsaw . Ka kyrwoh na ka KSU Mawkyrwat Circle ka la kyrpad ia baroh ki paidbah naduh ki longkmie longkpa, ki samla kynthei bad shynrang ban ia mih paidbah ha katei ka sngi.