Babu Kular Khongjirem
Ka drama thaw sorkar mynta ka sien ha Meghalaya ka la kylla long kaba isangsot bad isynei shibun ia ki seng riewlum jongngi.Ka UDP kam dei shuh ka nongbat shabi kumba ka long ha ka snem 2018 hynrei ka la kylla long pynban ka nongleit khrong shuki.Na ka saw ngut ki kyrdan Minister ha ka sorkar MDA-I sha tang ar ngut ki ioh ha ka MDA-II bad lada ki iai bteng ban leit kyrshan sa u snem 2028,kin sa pynbam nil(zero) syndon ka NPP ia ki. Bun ki seng riewlum ki la shah pynhiar kyrdan lut ha kane ka sien mynta.
Ka UDP kaba la jop tang 6 ngut ei ei ha u snem2018 (bad kham hadien sha ka 8 seat)ka la ioh doh kyndang haduh 3 ngut ki minister bad kawei ka post speaker.Mynta pat ka la ioh haduh 11 ngut,ka ioh pynban sa tang 2 ngut ki minister.Imat,lada ka iai bteng ban kyrshan NPP sa u snem 2028,ka NPP kan sa pynbam Nil ne zero syndon ia ka.Hynrei,katta ruh kim sngewthuh satia kat kane ka jingpynjah burom bad pynhiardan iabki. Ki PDF pat ki la ioh 4 ngut ki MLA ha u snem 2018, ka NPP ka ai minister tang uwei napdeng jong ki.Mynta pat ba ki jop tang 2 ngut,ka NPP ka la pynduh minister syndon ia ki baroh 2 ngut.
Nalor ba ka la pynshong lypa ia ki ha tnum kali,ki ioh shong shisha ruh tang da ka lyngknot(Chairman/Vice Chairman) kumba la dep maham lypa da uwei u nongialam ka NPP ia ki.Hynrei,wat lada ki la shah sloit ia ka iktiar bad pynhiar kyrdan haduh katne ruh hakhmat ki paidbah,katta ruh kim sngewthuh satia ia la ka kyrdan lajong. U Sing te ba u kloi ban leit shong kali MDA noh wut wut,um duhnong eh,u ioh hi uwei na ki 2 ngut kumba ioh ha u snem 2018.
Ha u snem 2018, ka sorkar MDA,-I la thaw ha ing u President ka UDP ha kato ka por, I (L)Dr. Donkupar Roy.U Himanta,u Conrad Sangma,u Dr Mukul Sangma ki leit pah leit khroh ia u President ka UDP ban thaw ia ka sorkar.Baroh ki peit khmat bad hap kohnguh ia ki kyndon jong ka UDP.Mynta ka sien pat,ka la i jah burom hi khait namar ki seng riewlum ki leit pah, leit nguh leit dem tang ban don lang ha ka sorkar ban ioh dohkyndang lem da ka doh shyieng ne da ka doh kyntait ruh imat kampher ia ki. Mynta la eh bha ia ki.Lada ki don lang ha ka sorkar ruh tang 2 ngut ki minister kin shah rkhie bein ha ki paidbah bad lada kin ran dien noh ruh kin shah kynshi- kyneh ha khmat ki paidbah ba bun.Ki la pynjah burom bad pynhiar dor ia ka kyrdan bad ka nam jong ki seng riewlum ha ka jylla Meghalaya jongngi.Kumno ki leit ai jubab hakhmat ki paidbah ha ka MDC Election kaban sa long ha u bnai March 2024?
Bun ki nongkyrshan ka UDP na ki unit bapher bapher kiba la ia pynpaw ka jingsngew mong ba ki shah pynjah burom ei kha ma kha ha ki nongialam jongki.Lada ka long ha kane ka rukom,ki seng riewlum ha Meghalaya mynta kin sah sa tang ka shynrong khlem ka met bad ka mynsiem(principles) bad ka long ruh ka jingleh rain bad jingjah burom hakhmat ka pyrthei baroh.
Kine kiei kiei ki pyni ba ka jait bynriew Khasi kam slem shuh ban long mraw hala ka jong ka RI.
“U kalbut halla re halla, u tur iap iap im im sha ka khlemraiñ”, ong u Babu Soso Tham.
Ki rakhe sngi Tirot Sing man u snem bad ki kynmaw bha bad iaroh ruh ia ki kyntien ba u la kren, “Bha ba iap kum u Syiem laitluid ban ia kaba synshar kum u Syiem mraw ” tangba ha jabieng lundaitmaw pat kam rung ne don jingmut.Lehrain u nongpeit ia u nongeit.
kein noh ka jingsngew party riewlum mynta lah paw pylleng ba kiba jop ki dei ki riew dum. balei kim lah ban ieng halor ka jingkwah bad jingthrang jongki paidbah ban ioh sorkar ban lam khmat da ki party riewlum ki kloi pynban ban kyrshan ia ka party kaba ki paidbah ba bun kila kyntait ia ka. kynmaw ho paidbah ban kyntait lut ia kiba kum kine ki party bha ban vote for vpp