Shah pynduh noh u Ayush, ïa ka bhah pule MBBS, namar ka JSU

Shillong:Ha kaba khatduh u Ayush Kumar u la shah pynduh ha kaba ïadei bad ka bhah pule MBBS namar ka jingïeng pyrshah jong ka seng Jaiñtia Students’ Union (JSU) bad ki nongïalam jong ka shnong Thangskai, East Jaiñtia Hills District.

Hynrei na liang ka JSU ka la ïai buddien halor kane ka jingleh shukor jong u Ayush ha kaba ka la dawa mardor na ka sorkar ba ka dei ban pyndam ïa u na state quota ban pule MBBS ha ryngkat ka jingïasnohkti lang ki nongïalam shnong Thangskai.
Na ka liang ki nongïalam ka JSU mynta ka Sngi ki la ïathuh ba ki la ïakynduh bad ai ruh da ka jingthoh sha ka Myntri ka tnat ka koit ka khiah ka Kong Ampareen Lyngdoh bad kumjuh sha u Bah Cyril V Diengdoh IAS uba dei peit ïa Home and Political Department ka sorkar jylla ha kaba ïadei bad kane ka phang.

Nalor kata ka JSU ka la buh ruh da ka shithi ujor sha u DC ban pynshisha ba u Ayush Kumar um dei hok ban ïoh ïa ka state quota ban pule MBBS namar u dei u bar jylla bad ba u kpa jong u don Aadhaar sha Bihar bad ka EPIC ruh ki don sha Bihar bad u kpa jong u, u dei uba shu sah trei ha Dalmia Cement bad ba um don hok ban ïoh PRC namar um dei u ba shong sah hapoh ka jylla.

Kumta ruh na ka liang ka JSU ka pynpaw ka jingsngewnguh ïa shnong Thangskai kaba lah pdiang ïa ka jingbakla da kaba buh da ka shithi ujor pyrshah ïa u Ayush bad ïa u kpa jong u sha u DC ka East Jaiñtia bad kane ka jingdawa ka seng ka long kaba jop.

Ha kajuh ka por ka JSU ka phah ruh ïa ka khubor sha baroh ki nongïalam shnong ka Bri u Hynñiewtrep ba kim dei satia ban ai klumar ïa ki syrnot shnong lane NOC ïa ki bar jylla nangne shakhmat namar ka lah ban ktah jur ha kiba bun ki liang bad ka long ruh kum ka jingïuhroit ïa ka hok jong ki trai ri trai muluk.
Lah ban kdew ba ka JSU hadien ba la lap ba u Ayush Kumar u la pyndonkam da ka PRC kaba shu ïoh thok na DC East Jaiñtia Hills ha u snem 2021 da ka ba aplai lyngba ka Temporary Residential Certificate na ka shnong Thangskai u lah ïoh ïa ka PRC, bad ha u juh u snem u la aplai da ka state quota MBBS 2023-24 bad ïa kane ruh u lah ïoh.