Shah pyndik bunsien ki nongdie dukan ha iew Lyngkhat ha ki shipai BSF

Shillong: Ki katto katne ki nongshong dukan ha iew Lyngkhat kaba don hajan pud hapdeng ka India bad ka Bangladesh, ki la kynnoh ba ki la ju shah pyndik ha ki shipai Border Security Force (BSF) man ka por haba ki wan rah ia ki mar ki mata na Shillong ban leit die ha dukan ha Iew Lyngkhat.
Ha ka jingiakren bad ki katto katne ki nongdie dukan, ki la kam ba bunsien ki BSF, ki ju pyndik da kaba thlia ba haba kit tiar na Pynursla, na Shillong, ki kynnoh ba wan kit na Bangla ne ba thmu ban leit sha Bangladesh.
“Bunsien ki thlia, ki pyndik lada wan kit mar na thain Pynursla ne na Sor Shillong, da kaba kynnoh ba ngi wan kit na Bangla ne thmu ban leit
die sha Bangla”, la kam i kong Stil Khongsdir iba ju die jingdie la bun phew snem ha kane ka iew.
I la ong ba ha ka jingshisha, ki shipai BSF ki dei ban iarap ia ki briew lajong hynrei ki pyndik bunsien.
“U BSF u phah plie ia ki jingteh ia ki mar, ba don kumne kumtai, u bat khlem pyllait bad u pyllait ruh hadien ba la pyndik slem bad ha ka por slap hap ban ap wat hapdeng ka jhieh ruh tang namar ba u thlia ia ki mar ki mata”, la kam I kong Stil.
I la ong ba don ka por ba u shipai BSF u pynphai biang ia ka mar bad don ba kim ju pynphai shuh.
Katba I kong Sinora Khongsdir I la iathuh ba don ki khep ba ki shipai BSF kila kynnoh ba ki shipai BSF ki pyrkhing bha ia ki nong-India ban thied ban die ia ki mar ki mata katba ia ki briew na Bangladesh, um shym la pyrkhing bha.
“Bunsien u BSF u ju pharep sniew ba ngi mut ban leit die sha Bangla, um tip ba ngin leit die shano shano bad thlia ia ki briew. Teng teng haba iaid lynti, u suba sniew ba ngi mut ban leit die mar sha Bangladesh”, la kynnoh I kong Sirdora.
Ki la ong ba kim sngew nang shano ban pyntip ne ban ujor haba ki shah pyndik ha ki shipai BSF namar ba ka jinglong nongkyndong jongki, kim ithuh lynti.
Ki la pynpaw ba ki BSF kiba peit ia ki nongshong shnong ka ri, ki dei ban iarap ban iada ia ki kum ki nongshong shnong ka India, ym ban pyndik ne ban thlia ia ki trai shnong.
Ha kawei ka liang, kine ki nongshong dukan ki la pynpaw ba ka iew Lyngkhat kaba la bna bha ha ki por mynshwa, mynta ka la nang pjah naduh ba la pyrkhing ki shipai BSF.