“Shah pom u shipai BSF da u sdie, haba khanglad khaii shini ha Kuliang”

Shillong:Ki shipai BSF ka Meghalaya Frontier, ki la pynshai ba ka jingjia ba jia hynnin ka miet ha Shnong Kuliang, East Jaiñtia Hills, ka la wan jia namar ka jingïakhun pyrshah ïa ka kam khaïi tuh ïa ka shini sha Bangladesh.

Katkum ka kyrwoh na ki BSF, hynnin ka miet ha ka por 11 baje eiei, kumba 30-35 ngut ki nongkhaïi Bangladesh ba la ïarap da ki briew na Kuliang, ki la wan rung tuh sha khappud India lyngba ka khappud ba khlem ker sainar jong ka Kuliang Border Outpost. Ka pyntip ba kine ki nong Bangladesh ki la wan rung sha Kuliang ban shimti ïa ka shini na ki nongkhaïi ka shnong Kuliang.

Ki BSF ki ïathuh ba haba ïoh jingtip ïa kane, ka kynhun ba kyrpang ki BSF ki la her wut wut sha katei ka jaka bad katba ki shipai ki dang don ha lynti, ki nong Bangladesh ki la phet sha Kuliang bad ha ka jingkthong, ki trai shnong ka Kuliang khnang ban ai lynti ïaid ba shngaiñ ïa ki nongkhaïi, ki la mih ban ïaleh pyrshah ïa ki BSF bad ki la lun maw naphang sha ki shipai nalor ka tim sih tim sang bad byrngem byrsit.

Ki pyntip ba ha kane ka jingïania, kawei ka longkmie ka la pom da u sdie ïa uwei u shipai haduh ba ula mynsaw na ka kti ka mon bad uwei pat u shipai ula mynsaw na ka kti ka diang, namar ka jingshah lun maw.
Ki shipai BSF ki pyntip ba mar ïajia kane ka jingjia, ki la pyntip ruh wut wut sha ki Pulit ka Umkiang Police Patrol Post kaba hab hapoh ka Lumshnong Police Station, ka East Jaiñtia Hills District.

Ha kane ka kyrwoh, ki shipai BSF ki la pyntip ba ka Shnong Kuliang kaba don marjan bha bad ka khappud, ka dei ka jaka khaïi tuh kaba jur bha. Ki nongkhaïi na Kuliang ki ju lum ïa ka shini ha la ki jong ki Ïing ne jaka ba ki buh, bad hadien ki sa Khaïi sha Bangladesh da ka jingïarap ki nongkhaïi tuh ka Bangladesh kiba shim kabu ïa ka jingbym ker sainar shiah ïa ka khappud.
Ki pyntip ba tang naduh u bnai Kyllalyngkot 2024, ki shipai BSF ha ka thaiñ Kuliang ki la ïoh ban kurup palat ïa ka 1 lak kilo ka shini ba thmu khaïi tuh sha Bangladesh.

Ki la ong ba ka jingïatyngkhuh bad jingpyni bor jong ki trai shnong ka ju jia beit man ka por haba ki shipai BSF ki pyrshang ban tehlakam ïa ka kam khaïi tuh ha ki jaka khappud ka thaiñ.
Halor kane ka jingjia ha Kuliang, la pyntip ba ki BSF ki la ujor sha ki Border Guard ka Bangladesh haba ïadei bad ka jing jam pud beaiñ jong ki nongkhaïi Bangladesh ha u pud u sam ka India.