Shillong 21 Risaw: Kiba bun ki paidbah nong shnong jong ka Lumsohpieng bad Lumdaitkhla Bhoirymbong kiba ieid bad sngewkhia ia ka Mariang, ki la pynpaw ïa ka jingsngewkhia kaba jur halor ka jingpom be-aiñ ïa ki dieng na khlaw shnong, kaba la tip kum ka Khlaw Raid, kaba don ha Bhoirymbong.
Kane ka khlaw, kaba long ka bynta kaba kongsan jong ka mariang bad ka kolshor jong ka shnong ka thaw ban iada ia ka khlaw ka btab bad ia ka khyndew ka shyiap lane kata ka jingpynneh ne jingbad ia ka riti ka dustur ban iada ia ka mariang, ka shah pynjot ha ki katto katne ngut ki briew khlem da ioh jingbit, kiba buh jingma ym tang ïa ka mariang hynrei wat ïa ka jingbha jingmiat jong ki nongshong shnong kiba shaniah ha kine ki marpoh khyndew.
Ka jingpom be-aiñ ïa ki khlaw ha Khlaw Raid ka wanrah ïa ka jingpynjot kaba jur ïa ka mariang, kaba wanrah ïa ka jingtwa khyndew, ka jingduh noh ïa ki jingthaw ba im, bad ka jingpynthut ïa ka jingkylla ka um.
Kine ki kam ki long kiba pynkhein ia ki ain kiba la don lypa kiba iadei bad ka mariang bad ia ka hok tynrai jong ki nongshong shnong, kiba la long ki nongsumar ia kane ka jaka la slem bah. Wat hapdeng ki kynhun ba na ka thain ki pyrshang ban pynsangeh ia kine ki kam beain, hynrei ka jinglong jingman ka dang iai bteng, kaba pynma shuh shuh ia ka mariang jong ka khlaw.
Ki paidbah nongshong shnong ka Bhoirymbong kiba sngewkhia ki khot bad wer ïa ki bor ba halor ha ka sorkar ba kin shimkhia mardor bad tyngeh ïa kane ka kam. Ngi kyntu ia ka tnad khlaw bad ki bor ba dei peit ban tohkit ia kane ka kam be-ain, ban pynshitom ia kiba suba don kti, ban pynjari ia ki kyndon ain kiba pyrkhing pyrshah ia kiba donkti, bad ban pyntreikam ia ki prokram pynneh pynsah bad ban iada ia ka Khlaw Raid.
“Ngim lah shuh ban ieng lyngngoh katba ki jaka khlaw ba kordor jong ngi ki dang shah knieh noh na ka bynta ka jingmyntoi kaba lyngkot ne shimet jongno re jongno,” Ka long ka jingshisha ba, “Ki dieng ha Khlaw Raid kim dei tang ki dieng – hynrei ki dei ruh ki bynta jong ka jinglong kyrpang jong ngi, ka jingim jong ngi, bad ka lawei jong ngi. Ngi kyrpad ïa ka jingïarap jong ki bor ba halor ban ïada ïa kane ka marpoh khyndew kaba kordor.” Ka kyndon 48A bad 51A (g) jong ka riti trei kam jong ka ri (Indian Constitution) ka kren shai ba ngi dei ban ai jingiada ia ka mariang, kumjuh ruh ka jinghikai na ka ktien jong U Blei Salm 96:11-12.
Ka jingiarap mardor ka long kaba donkam, ban Pynsangeh noh ia ka jingpom pathar ia ki khlaw: Pynjari ia ki ain kiba la don lypa kiba iadei bad ka mariang bad pynngat ia ki jingkitkhlieh ia kito kiba donkti ha ki kam pom pathar ia ki dieng.
Ka shnong ka la kyntu ia ka sorkar ba kan buh hakhmat eh ia kane ka kam bad ban shimkhia kyrkieh ban iada ia ka pateng khlaw jong ka Bhoirymbong na ka jingshah pynjulor shuh shuh.
Phi don ban ong eiei?