Shah ot khajna VAT, ki MLA Khasi & Jaintia na ka MLA Scheme

Shillong,1 Jymmang:
U MLA ka Mawshynrut konstitwensi u bah Witting Mawsor u la pynpaw ka jinglyngngoh namar ka jingshah leh shiliang khmat ki MLA Khasi bad Jaintia ha kaba u la ong ba ki MLA Khasi bad Jaintia ki shah ot khajna Value Added Tax ( VAT) kaba 5% na ka MLA Scheme kaba ki ioh T.2 klur na ka SRWP bad kiwei pat ki scheme. Utei u MLA u la pynpaw ka jingbitar ha kaba u la ong ba ym tang ba la ot tang ia ka 5% kaba dei katkum ka kyndon ban ot hynrei ki MLA Khasi -Jaintia ki la shah ot ar shah ia katei ka 5% ruh.
Haba ia kren bad u Rupang u la ong ba naduh ba thied ia ki tiar ki tar na ka Scheme kata ki shuki ki miej, ki kor komputor bad kiwei pat ki tiar la ot lypa na dukan ia ka Vat kaba 5% hynrei haba la poi ha Block ruh u la ong ba la shah ot biang ia katei ka 5% bad la ot hi da u BDO shuwa ban siew sha ki paidbah nongioh jingmyntoi.
“Nga sngew lyngngoh bha balei la ot tang ia ngi ki MLA Khasi bad Jaintia katba ki MLA Garo pat kim shah ot” ong u bah Witting Mawsor uba la iathuh ba hadien ba u ngat ha katei ka apot u la kylli na ki paralok MLA Garo jong u hynrei u la ong ba ki la jubab ba ki khlem shah ot eiei ruh.
“Nga la ia kren bad ka Deborah Marak bad u Nihim ki la iathuh ia nga ba ki khlem shah ot” ong biang u bah Witting Mawsor.
“Nga la ia kren bad u myntri rangbah ka jylla u Dr.Mukul Sangma, nga la kylli shai na u hato ka VAT ka dei ban ot tang ia ki MLA Khasi-Jaintia, u la jubab ia nga ba ka treikam ha baroh kawei ka jylla ym tang ia ki MLA Khasi-Jaintia hynrei ki MLA Garo ruh hynrei haba nga ia kren pat bad ki paralok MLA Garo ki ong ia nga ba ki khlem shah ot, 100% nga pynthikna ba ki khlem shah ot, don aiu sha lyndet na ka daw aiu ba ki ot tang ia ngi?” ong biang u bah Witting.
U bah Witting u la ong ba ka SRWP ka dei T.2 klur tyngka shisnem bad haba khein tang ia ka 5% ka la poi sha ka T.5 lak eiei bad lada kheiñ sa bad katei ka jingshah ot ar shah ka poi sha ka T.10 lak tyngka.
U la ong ba hangtei ka pisa ka la tuid ei sha madan bad lada jia ba ai sha u paidbah katno ka jingmyntoi kan long.