Shah nion ki khasi, ha ki kompeni Dewbilat ha Lumshnong

Shillong,15 Naitung:
Ka la don ka jingkyn noh ba ki Khasi kiba trei ha ki kompeni karkhana dewbilat kiba don ha Lumshnong , East Jaintia Hills ki ju shah nion bein bad shah pynshitom ha ki heh katei ka kompeni khnang ba kin phet noh na ka kam, bad ba kin ioh thung pat da ki bar jylla.
La iathuh ba ki la don bun ngut ki Khasi ki bym lah shah ia ka jingshah nion bein ki la phet na ka kam jong ki, bad hadien ba ki la phet la wan pat da ki bar jylla ban trei. Ki lad khubor ki la iathuh ba ka jingshah nion bein ka long ba ki heh ophisar katei ka kompeni ki ju phone ia ki nongtrei ba hapoh jong ki kiba dei ki Khasi ban wan trei wat haba ki la dep na ka kam jong ki, ki la ong ba kiba la shah pynshitom eh ki dei kito kiba trei ha ki kyrdan ba kham heh kum ki Enjiniar.
Halor katei ka khu bor, u nongthohkhu bor u la pyrshang ban wad jingtip na ki briew kiba trei ha kitei ki kompeni pyn mih dewbilat kiba don ha Lumshnong, hynrei kiba bun hi na ki kim nud ban iathuh bad ki tieng ioh ki shah behkam. Hynrei don pat napdeng jong ki kiba la iathuh ba katei ka jingshah nion bein ki Khasi ka long kaba shisha, ha kaba kawei ka bahaing jong u wei u samla uba trei ha katei ka kompeni ka la iathuh ba utei u bahaing jong ka u ju shah pyndik ha ki ophisar heh, bad ki ju phone ba un wan trei wat ha bym dei shuh ka por trei, ki ong ba donkam kyrkieh, ka la ong ba kim nud ban beh da kaba sha hynrei ki leh kumtei ba un phet noh, hynrei na ka liang jong u haduh myngta u iai shah namarba um ioh kam shawei. Ka la kynnoh ruh ba u bahaing jong ka u la ong ba kitei ki ophisar ki ong ruh ba kim kwah thungkam da ki Khasi, ki kwah da u bar jylla.
Haba ia kren pat bad katto katne ngut ki riew paidbah kiba sah marjan bad ki shnong ba don ki karkhana pynmih dewbilat ha Jaintia ki la iathuh ba ha ka por ba ki kompeni dewbilat ki wan nyngkong hapoh shnong ki wan ban kular ba kin ai kam ai jam pynbiang ki um bam umdih bad kiwei pat ki ingtei ki ban iarap ia ka shnong, hynrei mynta pat ki shnong ba don hangtei ki la tyrkhong um namarba kitei ki kompeni ki la tan lut shalade, bad wat ki dukan die jingdie ruh la iathuh ba ki la sdang ban wanrah da ki bar jylla ban phah die ia ki jingdonkam ki nongtrei kompeni.