Shah mait kyrteng khaw reshon ha Sohra

Shillong, 15 Risaw:
Ka Synjuk Ki Khlieh Nongsynshar Shnong Sohra ka pynpaw ka jingsngew khia kaba khraw halor ka jingshah weng bad mait kyrteng bad ka jingshah pynduh khaw reshon jong bun bah ki Nongshongshnong jong ka Thaiñ Sohra Subdivision khlem kano kano ka daw. Kane ka jingleh jong ka Sorkar ka la pynduh noh ia ka hok ban im ia kaba ka Sorkar Kmie ka la mang na ka bynta ki Nongshongshnong jong ka Ri India. Nalor ka jinghiran ha ka kamai kajih, ka jingbymiaid ka MCCL bad jingkhang ia ka tih shyiap tih dewiong, kane ka jingpynduh sa ia u khaw reshon kan sa ktah jur ia ki paidbah kiba la ban lypa ka jingduk jingkyrduh. Ka Synjuk ka dawa mar mar ba dei ban pynioh lut ia ki jingbam na ka PDS sha baroh ki Nongshongshnong jong ka Thaiñ Sohra baroh kawei kumba ka la ju leh ha ki snem ba lah dep, ong ka kyrwoh na U bah Eligius Sawian, General Secretary, Ka Synjuk Ki Khlieh Nongsynshar Shnong Sohra.