Nongpoh: Hynnin ka miet ha ka por 10:30 baje ei ei mynmiet, ki la don 3 tylli ki kali kiba mih na Guwahati da ka jingthmu ban leit sha ki thain Killing ha Ri Bhoi, ki la shah lute ha ka kynhun ki riew runar bym lah ban ithuh durkhmat bad kaba ki la shah lute phew hajar ka pisa bad ki mobile phone ruh kumjuh.
Ka jingtip kaba la iohlum, la ong ba katei ka jingjia ka la jia ha ka por ba kitei ki kali ki la poi ha kawei ka jaka shwa ban poi ha shnong Killing bad ha ki la poi ha katei ka jaka, la mih ka kynhun ki riew runar, kiba la pynsangeh ia kitei ki kali bad kiba la pynap ruh da ki tiar pynmynsaw, khnang ba kitei ki briew kiba shong ha kitei ki kali, kim nud ban pyrta ne ban pan jingiarap na ki briew.
La ong ruh ba kitei ki Kali ba la shah lute ki kynthup kawei ka Scorpio, kaba la shah lute T. 50 hajar ka pisa, nangta kawei pat ka ka Scorpio ka la shah lute 15 hajar bad kitei ki runar ki la knieh ruh ia ki ar tylli ki Mobile na ki briew kiba shong ha kitei ki kali.
Tang mar ia dep ia katei ka kam lute na kitei ki kali, la ong ba kitei ki runar ki la phet noh bak sha khlaw, kata hadien ba ki la iohi ba ki la don shibun ki kali, kiba la iaid lyngba katei ka surok. Haba iadei bad katei ka jingshah lute, ki trai kitei ki Kali ki la ujor da ka ejehar ha Khanapara Police Station, khnang ba ki pulit kin buddien bad ban kem ia kiteiki runar.
Phi don ban ong eiei?