U doktor, uba na Tamil Nadu, ula iap hynnin ka sngi, na ka jingpang coronavirus, hynrei ka jingsngew sih kaba khraw, ka long ba um shym la ioh ban pyndep ia ka met iap jongu, ha ka rukom kaba don burom.
U Dr Simon Hercules, u dei u doktor uba 55 snem ka rta, ula iap ha ka hospital ha Chennai hynnin ka sngi bad ula khlad ha ka por 6.15 hynnin ka janmiet bad la iathuh ba utei u doktor, ula ioh pang corona, da kaba ia bit, na ki nongpang, kiba u sumar.
Haba la dei ban leit on tep ia ka met jongu ha ka jaka tep ha Kilpauk, kito kiba sah marjan ki la ia khih pyrshah bad kim shym la shah ban tep ia katei ka met ha katei ka jaka tep. Ka la mih ka jing pyrshah kaba jur, ha kaba la beh thong ia katei ka kali kit met iap bad la lun da ki maw bad ki dieng ia katei ka kali, ha kaba u nongniah, ula mynsaw bad ki iit ki la pait lut. Kiba ha iing, ki la hap phet iap ialade, hynrei uwei u paralok jong U Dr Hercules, ula shimti ia katei ka met iap bad leit rah sha kawei pat ka jaka.
Kham hadien, la tep ia utei u doktor, ha ka jing pahara skhem bha ki pulit, khlem da don lang shuh kiba ha iing jongu.
Halor katei ka jingshah khanglad, ki pulit ki la kem ia ki 20 ngut ki briew kiba pynthut, ong ka khubor.
Sngew diaw sngew sih haba ki briew Kim don shuh ka jing ia tip lem