Nongstoiñ: Ka Khasi Students’ Union (KSU) West Khasi Hills District Unit kala pynpaw ia ka jingsngew-khia kaba jur ha kaba iadei bad ka jingshah leh shilliang khmat haka sorkar ia ka Nongstoiñ College kaba dei kawei na ki College ka ba la rim tam hapoh ka District kaba don ruh hapoh ka District Headquarter.
Ka Nongstoin College ka la ioh ia ka kyrdan Deficit College ha u snem 1996 bad ka sorkar ka siew tang ia ki 6 tylli ki post nonghikai ha kaba kiba bun ki nonghikai hapoh katei ka college ki ioh iaka jingsiew na ka bai class jong ki khynnah bad ban ia nujor ia ka jingsiew ka khamheh shibun ka tulop jong ki nongtrei Grade-IV jong ka sorkar jylla ban iaki nonghikai jong ka Nongstoin College.
Mynta la palat 20 tylli ki snem ka Nongstoin College ka la shah iehbein bad shah leh shilliangkhmat haka sorkar jylla ha kaba tang 6 tylli ki post kiba katei ka college ka ioh naka jingsiew naka sorkar hynrei haduh mynta ym shym la don kano kano ka jingiarap naka sorkar, bad lada ianujor bad kiwei kiwei ki deficit College hapoh ka jylla tang ka Nongstoin College kaba ioh khyndiat iaki sanction post.
U Samla Franklin Syiemiong, Education Secretary jong ka KSU, WKHD haba kren bad u nongthoh khubor u la iathuh ba ka seng ka sngewthuh shai ba ia ka Nongstoin College bad ia ka District hi baroh kawei la shah iehbein bad leh shiliang khmat ha kaba iadei bad ki kam pynroi kiba dei hok ban ioh da ka District ha kine ki phew snem ba la dep, bad ym lah ban len ba ka daw ba nyngkong eh jongka jingsahdien jong ka District ka dei namar ka jing leh shiliang khmat jong ka sorkar ha kito ki por.
U Samla Franklin u la iathuh ruh ba ka West Khasi Hills ka la donkam palat ia ka College sorkar ne ka Government College lada khein iaka jingroi jong ki samla pule bad kumjuh iaka jingduk kaba ban iaka thain kumta ka sorkar ha kine ki 20 snem mynshuwa kam shym la iohi iaka jingduk bad jingduna jong ka district bad kam shym la khein kor iaka jingdonkam jong ka pule puthi hapoh ki thain Nongkyndong.
U samla Rishotskhembor Kharbani, General Secretary jong ka KSU, WKHD Unit ha ba iathuh ia katei ka bynta kaba iadei bad ka Nongstoin College la ong ba ka seng KSU ka la iakynduh la bun ngut ki Chief Minister ha ki snem ki ba la leit kumjuh ia ki Education Minister ryngkat ki dorkhas kiba ym lah shuh ban niew halor ban dawa ban thung khambun ki sanction post bad ka jingdawa iaka Government College hapoh ka District.
Phi don ban ong eiei?