Ka Congress ha Mizoram, ka la pynmih ia ka thup kaba nyngkong jong ki kandidet, ki ban ialeh ia ka elekshon ha ka 28tarik Naiwieng 2018 bad katei ka thup ba nyngkong, ka kynthup ia 36ngut ki kandidet, ba kynthup ruh ia U Lal Thanhawla, myntri rangbah ka Jylla, u ban iakhun na Champhai South constituency.
Na ki 36ngut ki kandidet, ki don 12ngut ki riew thymmai bad 3ngut na kitei, ki dei kiba hapoh 40snem ka rta.
Ki MLA, kiba la shah pynduh tiket, ki long U R Romawia, uba dei u myntri sorkar, nangta U Lalrinmawia Ralte, myntri sorkar barim bad kumjuh U Deputy Speaker Lalrinawma.
Lah ban pynkynmaw ba ha ki khyndiat taiew ba ladep, ba U R Lalzirliana, myntri kam poh iing jong ka sorkar Jylla, ula iehnoh kam bad un iakhun noh na ka tiket jong ka Mizo National Front (MNF). Hadien kata, u myntri barim ka koit ka khiah, U Lalrinliana Sailo, ula hiar shuki noh lem bad U BD Chakma, uba la rai ban nym ialeh shuh na ka tiket Congress.
Nalor kitei, ki don 8ngut ki MLA ba mynta jong ka seng Congress, kiba la shah pynduh tiket.