Shah kynnoh u draibar ba mut pyniap ia U Mukul Sangma

Shillong,12 Rymphang:
Ki nongñiah kali kmai ne ki Local Taxi mynta ka sngi ki la rakhe kum ka sngi burom jong ki bad ka dei ka jingrakhe kaba sdang bad kaba nyngkong eh kaba kin iai kynmaw burom man la u snem. La buh ia ka 12 tarik kum ka sng jong ki, da ka East Khasi Hills Local Taxi Welfare Association ha ryngkat bad ka jingiatreilang bad ka Taxi Association na Nongstoiñ bad Jowai.
Ki nongñiah Taxi ki la jied ia ka 12 tarik kum ka sngi burom jong ki naba ka dei ruh ka sngi ba uwei na ki nongniah kali sha ki thaiñ Nongkhlaw u Jeskalur L. Mawdoh uba niah ia ka Tourist Maxi Cab u la shah kem bad la shah pynngat ha ka kyndon aiñ 307 IPC kaba dei ka kyndon kaba la ong ba u don jingthmu ban pyniap briew bad ka dei ruh ha katei ka sngi ba ka kali ba niah u Jeskalur ka la tyngkhuh bad ka kali u myntri rangbah ka jylla u Dr.Mukul Sangma ha 3 Mer Upper Shillong ha ka por 1:30 baje nohphai sngi. Hynrei hadien ba la mih ki kynhun bapher ban pyrshah ia katei ka jingpynngat kyndon aiñ pyniap briew la weng noh ia katei ka kyndon bad la pynngat noh tang ha ki kyndon 279,336 bad 427 IPC.
Ki nongniah kali kamai ki la sdang ia ka jingrakhe sngi burom nyngkong jong da kaba pynlong ia ka jingialang ha Iewduh (Stand Jeep), Shillong. La pynbna paidbah ia ka 12 tarik u rymphang kum ka sngi ki nongniah kali da u myntri barim ka sorkar jylla u bah A.L Hek. Kiwei pat kiba la donlang ha katei ka jingialang ki long u bah N Syiem, SP City (Traffic), u Bah Peter A Dohkrut -President ka Shillong Law College Student’s Association, u Bah Disparsing Rani u nongaibuit ki nongniah Taxi ha East Khasi Hills, u President katei ka Association u Bah John Thabah, u bah W. Jyrwa -Secretary, ki nongniah taxi kamai na kylleng ki jaka jong ka nongbah bad kumjuh na nongkyndong.
Lah ban pynkynmaw, ba ha ka 12tarik Rymphang 2016, ka kali kamai jong U Bah Jeskalur, ka Max, ka la syllud malu mala ia ka kali jong u myntri rangbah ha khongdong 3mer, upper Shillong bad mar kumta hi la kem ia u da ki pulit, ha kaba la kynnoh ba u mut ban pyniap ia u myntri rangbah.