Ka jingiasei madan bad ka jingiakynnoh shah leh kynshleiñ ha ka Mee Too Movement ka dang iai bteng ha kaba ka la mih ka jingkynnoh ia sa uwei u Manager ka Bollywood uba dei ruh u Co-Founder ka Talent Management Agency Kwan u Anirban Das Blah. U Blah u dei uba la heh la san ha nongbah Shillong bad ki kmie ki kpa jong u ki trei hapoh ka State Bank of India. U la leit ban pyndep ia ka jingpule klas XI bad klas XII jong u sha Delhi Public School Mathura Road bad u la pyndep dia ka Bacheldor Degree ha Delhi University ‘s Kirori Mal college bad hangtei u la sdang paw kum nongialam jong ka North East Students Federation of India.
U Blah u la shah kynnoh kynshleiñ ha ki 4 ngut ki kynthei bad ki la ong ba u la leh kynshleiñ ia ki ryngkat ki ktien khlem akor. Kawei ka kynthei ka la ong ba ka la ia dei kam bad u Blah la ar snem eiei bad ka la don kawei ka khep ha kawei ka jingialang ba u la pasiaw ba u kwah ban ia thiah lok bad ka hynrei kam treh satia bad ka la kynhied ia u bad ka la ong ba tang hapoh 6 bnai kam ioh kam shuh na u bad ia ki kam ba dei ban ioh ma ka la ain oh sha kiwei pat ki actress kiba u don jingiadei kaba jan bad namar katei ka jingbym ioh kam ka la ong ba ka la pynkut noh ka jingiadei bad katei ka Agency.